काठमाडौं- इरानी विदेशमन्त्री सइद अब्बास अराघचीले पूर्ण अविश्वासका साथ आफूहरुले अमेरिकासँग वार्ता गर्न लागेको स्पष्ट पारेका छन् । उनले अमेरिकाले विगतमा गरेका वाचाहरू बारम्बार तोडेको र कूटनीतिक मूल्य र मान्यतालाई धोका दिएको आरोप समेत लगाएका छन् ।

जर्मन समकक्षी जोहान वाडेफुलसँगको कुराकानीका क्रममा उनले यस्तो बताएको इरानको मेहर समाचार संस्थाले जनाएको छ । अराघचीले इरानी जनताको अधिकार र राष्ट्रिय हितको रक्षाका लागि आफूहरू पूर्ण शक्ति लगाएर लड्ने दृढता व्यक्त गरेका छन् ।

अमेरिकाले विगतमा देखाएको व्यवहारका कारण वार्ताप्रति आफूहरू सशंकित भए पनि जनताको पक्षमा उभिन आफू पछि नहट्ने उनको भनाइ छ ।

शनिबार अमेरिकासँग शान्ति वार्ता गर्न अराघचीसहितको टोली पाकिस्तानको राजधानी इस्लामावाद पुगेको छ । वार्तामा सहभागी हुन विदेशमन्त्री अराघचीसँगै इरानी संसदका सभामुख मोहम्मद बघेर कलिबाफ पनि इस्लामावाद पुगिसकेका छन् ।

अमेरिकाको तर्फबाट उपराष्ट्रपति जेडी भान्स लगायतको प्रतिनिधिमण्डल पनि वार्तामा सहभागी हुन त्यहाँ पुगेका छन् । यो वार्तासँगै दुई देशबीच करिब डेढ महिनादेखि जारी द्वन्द्व अन्त्य हुने अपेक्षा गरिएको छ ।