काठमाडौं- श्रीलंकाका विपक्षी दलका नेता सजित प्रेमदासाले भारतलाई संयुक्त राष्ट्र संघको सुरक्षा परिषदको स्थायी सदस्य बनाइनुपर्नेमा जोड दिएका छन् । भारतीय समाचार संस्था एएनआईसँगको कुराकानीमा उनले भारतलाई ‘शान्ति प्रेमी’ राष्ट्रको संज्ञा दिए ।

उनले विश्वको वर्तमान भू-राजनीतिक अवस्थामा भारतको भूमिका महत्त्वपूर्ण रहेको उल्लेख गरे । प्रेमदासाका अनुसार भारतले सधैँ लोकतान्त्रिक मूल्य-मान्यता र क्षेत्रीय स्थिरताको वकालत गर्दै आएको छ ।

उनले भारतजस्तो ठूलो लोकतन्त्र र बढ्दो आर्थिक शक्तिलाई सुरक्षा परिषद्को निर्णय प्रक्रियामा सहभागी गराउनु विश्व शान्तिका लागि आवश्यक रहेको बताए । उनले भारतको स्थायी सदस्यताका लागि श्रीलंकाको तर्फबाट पूर्ण समर्थन रहेको समेत स्पष्ट पारे।

दक्षिण एसियाली छिमेकी राष्ट्रका नेताबाट आएको यो अभिव्यक्तिले अन्तर्राष्ट्रिय मञ्चमा भारतको बढ्दो प्रभाव र सुरक्षा परिषद्मा सुधारको मागलाई थप बल पुर्‍याएको छ । भारतले लामो समयदेखि सुरक्षा परिषद्को स्थायी सदस्यताका लागि दाबी गर्दै आएको छ ।