काठमाडौं– सामाजिक सञ्जालमार्फत नियमित आफ्नो विचार सार्वजनिक गर्ने नेपाली कांग्रेसका सभापति गगन थापा पछिल्लो केही दिनयता गुमनाम जस्तै छन् । फागुन २१ को निर्वाचनसम्म दिनदिनै सामाजिक सञ्जालमा भिडियो, फोटो र टेक्स्टमार्फत सन्देश जारी गर्दै आएका सभापति थापा ४ दिनयता नदेखिएका हुन् ।
कांग्रेसभित्र र तत्कालीन संसद्मा बलियो प्रतिपक्षकारूपमा आक्रामक देखिने थापाले आफ्नो विचार अभिव्यक्त गर्ने थलोका रूपमा सामाजिक सञ्जाललाई उपयोग गर्दै आएका थिए ।
उनले अघिल्लो संसद्मा रास्वपाका सभापति रवि लामिछानेमाथि सहकारी ठगीको विषयमा संसदीय समिति नै बनाएर छानबिन गर्न बाध्य बनाएका थिए । जेन-जी आन्दोलनपछि मुलुकमा देखिएको राजनीतिक अन्यौलता चिर्न पनि उनले निकै अग्रसरता देखाए । ती दुवै सन्दर्भमा थापाले सामाजिक सञ्जाल र मिडियामार्फत आफ्ना विचारहरू शृङ्खलाबद्ध रूपमा प्रस्तुत गर्ने गर्थे ।
कांग्रेसलाई विशेष महाधिवेशनमा पुर्याएर नेतृत्व पनि हात पार्न सफल भएका उनी निर्वाचनको दिनसम्म पनि सामाजिक सञ्जालमा निकै सक्रिय थिए । तर, निर्वाचनमा सबै पुराना दलसँगै नेपाली कांग्रेसको पनि सर्मनाक हार भएपछि भने सभापति थापा सामाजिक सञ्जालबाट हराएका छन् ।
किन हराए ?
प्रतिनिधिसभा सदस्य निर्वाचनमा सर्लाही ४ बाट उम्मेदवार बनेका थापा कांग्रेस छाडेर स्वतन्त्र हुँदै रास्वापामा प्रवेश गरेका डा अमरेशकुमार सिंहसँग १२ हजार मतले पराजित भए । उनी मात्रै नभएर अघिल्लो निर्वाचनमा ८९ सिटको कांग्रेसले लज्जास्पद हार बेहोर्यो । कांग्रेस प्रत्यक्षतर्फ १८ सिटमा खुम्चिएको छ ।
जबकि यो निर्वाचनमा थापाले ‘बद्लियो कांग्रेस, बदल्छौँ देश’ र ‘अबकी बार गगन सरकार’ नारा अघि सारेको थियो । जुन नाराले नै विगतमा विग्रिएको कांग्रेसलाई उनले बदलेको सन्देश दिएको थियो । तर, उनका ती दुवै नारालाई जनताले अस्वीकार गरिदिए ।
धेरैले सभापति थापा कांग्रेसको सर्मनाक हारकै कारण लज्जाबोध हुँदा सार्वजनिक रुपमा नदेखिएको पनि अनुमान गरेका छन् । थोरै मिडियाकर्मीसँग मात्रै प्रत्यक्ष संवाद गर्न रुचाउने उनले निर्वाचन परिणामपछि कसैलाई पनि प्रतिक्रिया दिएका छैनन् ।
सोमबार मात्रै थापा र उपसभापति विश्वप्रकाश शर्माबीच नयाँ बानेश्वरमा सम्वाद भएको थियो । त्यस भेटमा थापाले विश्वप्रकाशलाई राजीनामा दिने बताएका थिए । तर, शर्माले राजीनामाको हतार नगर्न थापालाई सुझाएको श्रोतले बताएको छ ।
त्यसयता थापा गुमनाम जस्तै छन् । कांग्रेस नेताहरूले उनी घरमै आराम गरिरहेको दाबी गरेका छन् ।
तर, थापाको निकटमा लामो समयदेखि रहेर काम गर्दै आएका पार्टीका केन्द्रीय सदस्य अजयबाबु सिवाकोटीले उनी चुनावी अभियानपछि अस्वस्थ भएकाले नबोलेको खबरहबलाई बताए ।
‘सञ्चो नभएर, चेस्ट इन्फेक्सन भएर रेस्टमा हुनुहुन्छ’, उनले भने, ‘सिरियस हुनुहुन्न तर, औषधि लिइरहनुभएको छ ।’
निर्वाचनमा कांग्रेसको हारपछि पार्टीमा अर्को पक्षले विशेष महाधिवेशनको औचित्य समाप्त भएको र कांग्रेस नयाँ ढंगले अघि बढ्नुपर्ने आवाज उठाएको छ ।
यसका साथै, देशैभरीका कांग्रेसका नेता तथा कार्यकर्ताले पछिल्लो विकसित परिस्थितिलाई सम्बोधन गर्दै सभापतिले सम्बोधन गर्नुपर्ने आवाज पनि उठाएका छन् ।
प्रतिक्रिया