काठमाडौं– फागुन २१ गते सम्पन्न प्रतिनिधिसभा निर्वाचन अन्तर्गत समानुपातिक तर्फको मतगणना सम्पन्न भएको छ । 

बुधबार समानुपातिक निर्वाचन प्रणालीको मतगणना सम्पन्न भएको आयोगका प्रवक्ता नारायणप्रसाद भट्टराईले जानकारी दिए।

उनले सम्बन्धित निर्वाचन क्षेत्रबाट मतगणनाको प्रतिवेदन संकलन गर्ने काम भइरहेको र त्यसलगत्तै समानुपातिकतर्फ प्राप्त गरेको सिट सङ्ख्या यकिन गरेर उम्मेदवार सिफारिस गर्नको लागि सम्बन्धित दललाई पत्राचार गरिने बताए ।

समानुपातिक तर्फ रास्वपाले करिव साढे ५१ लाख मत प्राप्त गरेको छ, त्यस्तै कांग्रेसले साढे १७ लाख, एमालेले साढे १४ लाख, नेकपाले ८ लाख मत प्राप्त गर्दा श्रम संस्कृति पार्टी र राप्रपाले थ्रेस होल्ड कटाउन सफल भएको छ ।

दलहरूबाट प्राप्त उम्मेदवार सिफारिस रुजु गरेर समानुपातिकतर्फ निर्वाचित हुने उम्मेदवारहरूको अन्तिम सूची तय गरिने आयोगका प्रवक्ता भट्टराईले बताए । त्यस्तै उनले निर्वाचनका सबै काम अन्तिम चरणमा पुगेकाले आयोगमा स्थापना गरिएका अतिरिक्त संरचनाहरू बन्द गरिएको जानकारी दिए ।

अतिरिक्त संरचनाहरूमा काम गरेका कर्मचारीहरूलाई आयोगले सम्बन्धित कार्यालयमा फिर्ता गरिएको उनले बताए ।