एजेन्सी– मेक्सिकोमा पछिल्ला केही वर्षमा जफत गरिएका अवैध हतियारमध्ये ७७ प्रतिशत अमेरिका बाट आएको खुलासा भएको छ। मेक्सिकोका रक्षा सचिव रिकार्डो ट्रेभिल्ला ट्रेजोले मंगलबार आयोजित पत्रकार सम्मेलनमा सो जानकारी दिएका हुन्।

उनका अनुसार सुरक्षाकर्मीहरूले विगत केही वर्षमा करिब १८ हजार अवैध हतियार बरामद गरेका छन्। तीमध्ये अधिकांश हतियार अमेरिकाबाट सिमापार भित्रिएको पाइएको छ।

पत्रकार सम्मेलनमै राष्ट्रपति क्लाउडिया शैनबाउमले ती हतियार संगठित अपराध समूहको हातमा कसरी पुगे भन्ने विषयमा गहिरो अनुसन्धान आवश्यक रहेको बताइन्। उनले ड्रग तस्करी र सिमापार हतियार तस्करीलाई मेक्सिकोले सामना गरिरहेको प्रमुख सुरक्षा चुनौतीका रूपमा उल्लेख गरिन्।

राष्ट्रपति शैनबाउमले आपराधिक गिरोहलाई कमजोर पार्न र देशको सुरक्षा सुदृढ बनाउन अन्तर्राष्ट्रिय सहकार्य अनिवार्य रहेको बताइन्। विशेष गरी अमेरिकासँगको सुरक्षा तथा सशस्त्र समन्वय अझ प्रभावकारी बनाउनु आवश्यक रहेकोमा उनले जोड दिइन्।

यस खुलासाले अमेरिका–मेक्सिको सीमाबाट हुने अवैध हतियार ओसारपसारको समस्या फेरि एकपटक चर्चामा ल्याएको छ। प्रायः सिमापार तस्करीमार्फत अवैध हतियारहरू गिरोह र आपराधिक नेटवर्कसम्म पुग्ने गरेको बताइएको छ।