काठमाडौं – आईसीसी टी–२० विश्वकपमा पाकिस्तानले लगातार दोस्रो जित निकालेको छ । मंगलबार राति भएको समूह ‘ए’को खेलमा पाकिस्तानले अमेरिकामाथि ३२ रनको जित निकालेको हो ।

पहिला ब्याटिङ गरेको पाकिस्तानले अमेरिकाविरुद्ध पूरै २० ओभर खेल्दै ९ विकेटको क्षतिमा १९० रन बनाएको थियो । १९१ रनको लक्ष्य पछ्याएको अमेरिकाले २० ओभरमा आठ विकेटको क्षतिमा मात्र १५८ रन बनाउन सक्यो ।

पहिला ब्याटिङ गरेको पाकिस्तानका लागि ओपनर साहिबजादा फरहानले विष्फोटक ब्याटिङ गर्दै सानदार अर्धशतक बनाए । ४१ बल खेलेका उनले ६ चौका र पाँच छक्काको मद्दतमा सर्वाधिक ७३ रन बनाएका हुन् ।

बाबर आजमले ३२ बलमा ४६ रन जोड्दा उसका लागि सादाब खानले १२ बलमा ३० रन थपे । अमेरिकाका लागि श्याड्ली भान शाल्कवाइकले आक्रामक बलिङ गर्दै चार विकेट लिएँ।

१९१ रनको लक्ष्य पछ्याएको अमेरिकाले जवाफी ब्याटिङ गरेको हो । उसका लागि शायन जायागिरले ४९ रन बनाउँदा शुभम रञ्जानेले अर्धशतक बनाए । मिलिन्दु कुमारले २९ रन थप्नुबाहेक अन्य ब्याट्सम्यायनले भने उल्लेख्य रन जोड्न सकेनन् । अमेरिकालाई सस्तैमा समेट्न पाकिस्तानका उस्मान तारिकले तीन विकेट हात पारे ।

यो जितसँगै चार अंकसहित पाकिस्तान समूह ‘ए’को शीर्ष स्थानमा उक्लिएको छ । एउटा मात्र खेल खेलेको भारत दुई अंकसहित दोस्रो स्थानमा छ । दुई खेलमा एक हार र एक जित निकालेको नेदरल्यान्ड्स दुई अंकसहित तेस्रो स्थानमा छ भने नामिबिया र अमेरिका अंकबिहीन छन् । समूह ‘ए’मा पाकिस्तान, भारत, नेदरल्यान्ड्स, नामिबिया र अमेरिका छन् ।