काठमाडौं- श्रीलंकाका विपक्षी नेता सजिथ प्रेमादासाले हिन्द महासागर तथा दक्षिण एशियाको शान्ति तथा स्थीरताका लागि भारतीय नेतृत्व अत्यन्त आवश्यक रहेको बताएका छन् ।

समागी जन बलावेगया पार्टीका नेतासमेत रहेका उनले दक्षिण एशिया र हिन्द महासागर क्षेत्रमा दीर्घकालीन शान्ति तथा स्थीरताका लागि भारतीय नेतृत्व अत्यन्त महत्वपूर्ण रहेको बताएका हुन् ।

भारतीय समाचार संस्था एएनआईसँगको कुराकानीका क्रममा उनले भारत र श्रीलंकाका राष्ट्रिय हितमा धेरै समानता रहेको उल्लेख गरे । यसबाट दुई छिमेकी मुलुकबीच आपसी सम्मान, समझदारी र सिर्जनात्मक सहकार्यको आधार तय भएको उनको भनाइ छ ।

उनले संयुक्त राष्ट्रसंघको सुरक्षा परिषदमा भारतीय सदस्यताका लागि आफ्नो समर्थन रहने पनि बताए ।

नरेन्द्र मोदी नेतृत्वको भारत सरकारले आर्थिक समस्याको समयमा श्रीलंकाली जनतालाई सहयोग गरेको स्मरण गर्दै दुई मुलुकबीच बलियो सम्बन्ध कायमै रहे त्यसले दुबै मुलुकका नागरिकलाई प्रत्यक्ष लाभ मिल्ने बताए ।