काठमाडौं– चितवनको इच्छाकामना गाउँपालिका–४, कुरिनटारमा रहेको इच्छाकामना आधारभूत अस्पतालले पहिलोपटक सुविधासम्पन्न भवनबाट सेवा सुरु गरेको छ । 

बागमती प्रदेशका मुख्यमन्त्री किरण थापा मगरले आइतबार नवनिर्मित भवनको उद्घाटन गरेका हुन् । 

यसअघि स्वास्थ्यचौकीको भवनबाट सेवा प्रदान गर्दै आएको अस्पतालले अब नयाँ भवनबाट सेवा दिने भएको छ । 

१५ शय्याको यस अस्पतालको भवन १४ करोड ५० लाख रुपैयाँको लागतमा निर्माण गरिएको हो ।

इच्छाकामनासहित गोरखा र धादिङ जिल्लाका विभिन्न स्थानीय तहका नागरिकले समेत यस अस्पतालबाट स्वास्थ्य सेवा लिँदै आएको गाउँपालिका अध्यक्ष दानबहादुर गुरुङले बताए । 

पृथ्वीराजमार्गमा हुने सवारी दुर्घटनाका घाइतेले समेत अस्पतालबाट आकस्मिक सेवा लिँदै आएका छन् ।

तस्बिरहरु : हीरालाल गुरुङ/नेपाल फोटो लाइब्रेरी