काठमाडौं- इरानविरुद्ध युद्ध सुरु भएयता मध्यपूर्वमा ज्यान गुमाउने अमेरिकी सैनिकको आधिकारिक सङ्ख्या २१ पुगेको अमेरिकी रक्षा प्रशासन पेन्टागनले जनाएको छ ।

पेन्टागनका हताहती विश्लेषण प्रणालीले शनिबार थप दुई जनाको मृत्यु भएको जनाएको छ । समाचार संस्था एपीका अनुसार एक रक्षा अधिकारीले यी मृत्युहरू युद्धको प्रारम्भिक चरणमै भएको बताएका छन् ।

उनका अनुसार मन्त्रालयले युद्धमा भएका क्षति मात्र नभई उक्त क्षेत्रमा कार्यरत सबै अमेरिकी सेनाको मृत्युलाई समेटेर तथ्याङ्कलाई थप व्यापक बनाउने प्रयास गरिरहेको छ ।

नयाँ तथ्याङ्क अनुसार कुवेतमा अमेरिकी सेनाको ४२औँ इन्फ्रान्ट्री रेजिमेन्टमा सेवारत न्यूयोर्क प्रहरी अधिकारी मेजर सोरफ्लाई डेभियस पनि मारिएका छन् । मार्च ६ मा युद्ध सुरु भएको केही दिनपछि स्वास्थ्यसम्बन्धी समस्याका कारण उनको मृत्यु भएको थियो ।

अर्का मृतकको भने नाम खुलाइएको छैन । हाल मध्यपूर्वमा दशौँ हजार अमेरिकी सैनिक तैनाथ छन् ।