काठमाडौँ – केन्यासहित अफ्रिकी मुलुकमा बसोबास गरिरहेका नेपालीहरूले भोग्नुपरेका कानुनी तथा प्रशासनिक समस्या समाधानका लागि कूटनीतिक पहल गरिदिन नेपाल सरकारसँग आग्रह गरेको छ ।

केन्या गणराज्यको नैरोबीस्थित नेपाली अवैतनिक वाणिज्यदूत डा. जिमी अस्करले प्रतिनिधि सभाका सभामुख डोलप्रसाद अर्यालसँग शिष्टाचार भेट गर्दै अफ्रिकी क्षेत्रमा रहेका नेपालीहरूको बसोबास र कन्सुलर सेवासम्बन्धी विषयमा ध्यानाकर्षण गराएका हुन् ।

सिंहदरबारस्थित सभामुखको कार्यकक्षमा भएको भेटमा अफ्रिकी मुलुकहरूमा बसोबास गरिरहेका नेपालीहरूको वर्तमान अवस्था, उनीहरूको कानुनी हैसियत तथा आवश्यक सहजीकरणका विषयमा विस्तृत छलफल भएको थियो ।

भेटका क्रममा वाणिज्यदूत डा. अस्करले नेपालीहरूको बसोबाससम्बन्धी समस्या समाधानका लागि नेपाल सरकारका तर्फबाट आवश्यक कूटनीतिक कदम चाल्न अनुरोध गरेका हुन् ।

त्यस्तै, दक्षिण अफ्रिकास्थित नेपाली राजदूतावास बन्द भएपछि त्यस क्षेत्रमा रहेका नेपालीहरूले भोग्नुपरेका समस्या र उनीहरूलाई आवश्यक कूटनीतिक तथा कन्सुलर सेवा कसरी सहज रूपमा उपलब्ध गराउने भन्ने विषयमा पनि गहन छलफल भएको थियो ।