काठमाडौं – नेकपा एमालेका केन्द्रीय सदस्य झपट रावलले पार्टी पुनर्गठन कार्यदलका संयोजक रामबहादुर थापा ‘बादल’ले प्रस्तुत गरेको दस्तावेज वस्तुनिष्ठ र समग्र राजनीतिक प्रतिवेदन नभएको टिप्पणी गरेका छन् ।

रावलले दस्तावेज एकाङ्गी, पूर्वाग्रहप्रेरित र व्यक्ति केन्द्रित ‘टिपोट’मा सीमित रहेको आरोप लगाएका छन् । उनले सांगठनिक विधि र वैचारिक गम्भीरताका आधारमा दस्तावेजमा गम्भीर कमजोरी रहेको बताएका छन् ।

रावलका अनुसार २५ बुँदामा सीमित उक्त दस्तावेज महासचिवद्वारा प्रस्तुत मूल मस्यौदाको समग्र र गम्भीर समीक्षामा आधारित छैन । मूल मस्यौदाको मर्म, नीति र समग्र राजनीतिक कार्यदिशाको वस्तुगत विश्लेषण गर्नुभन्दा त्यसको एउटा अंश र व्यक्तिविशेषको स्तुति वा टिप्पणीमा मात्रै केन्द्रित भएको उनको भनाइ छ ।

उनले पार्टी पुनर्गठन, रूपान्तरण र आगामी राजनीतिक कार्यदिशाबारे देशभरका नेता–कार्यकर्ताका १३ वटा समूहबाट प्राप्त सुझावलाई दस्तावेजले बेवास्ता गरेको पनि आरोप लगाए । ‘तल्लो तहका समर्पित कार्यकर्ताहरूको पसिना, भावना र दूरदर्शी सोचलाई उपेक्षा गरेर गरिने कुनै पनि अभ्यासले पार्टीलाई सही दिशा दिन सक्दैन,’ रावलले भनेका छन् ।

कार्यदलका संयोजक स्वयंले आफू नेतृत्व गरिरहेको कार्यदल, त्यसको स्थापित क्षेत्राधिकार र पूर्वस्वीकृत प्रक्रियामाथि प्रश्न उठाउनु पनि राजनीतिक र नैतिक रूपमा विरोधाभासपूर्ण रहेको रावलको टिप्पणी छ। यसले कार्यदलको साख, निष्पक्षता र सांगठनिक विधिमाथि प्रश्न उठाएको उनले बताएका छन् ।

रावलले पार्टीलाई व्यक्तिवादी प्रतिरक्षा, एकाङ्गी टिप्पणी र सङ्कुचित घेराबन्दीबाट बाहिर निकाल्नुपर्नेमा जोड दिएका छन् ।
उनका अनुसार पार्टीमा वैचारिक स्पष्टता, संगठनात्मक सुदृढता र नयाँ ऊर्जा ल्याउन देशभरका १३ वटा समूहबाट प्राप्त सुझावलाई पूर्ण रूपमा आत्मसात् गर्नु नै पार्टी पुनर्गठनको ‘वस्तुनिष्ठ, वैज्ञानिक र ऐतिहासिक बाटो’ हो ।