काठमाडौं– खाना पकाउने ग्यासको अभाव चर्किएपछि विद्यार्थी संगठनहरूले शुक्रबार नेपाल आयल निगमको मुख्यालय घेराउ गरेका छन् ।

ग्यासको मूल्य बढाइए पनि बजारमा ग्यास सहज रूपमा उपलब्ध नभएको भन्दै विद्यार्थी संगठनहरूले निगमको मुख्यालयअगाडि प्रदर्शन गरेका हुन् । 

उनीहरूले थाल र खाली ग्यास सिलिन्डर बोकेर प्रदर्शन गर्दै बजारमा ग्यासको सहज आपूर्ति सुनिश्चित गर्न सरकारसँग माग गरेका छन् । 

नेपाल विद्यार्थी संघकी अध्यक्ष करुणा कटवालले जनतालाई गाँस र बासको आधारभूत आवश्यकता समेत पूरा गर्न नसकेको आरोप लगाउँदै सामाजिक सञ्जालबाट मात्रै सरकार चलाउन खोजिएको भन्दै सरकारको आलोचना गरिन् । 

उनले देशमा ठूलो संकट देखा परेको भन्दै त्यसको समाधानका लागि संयुक्त विद्यार्थी संगठनहरू जस्तोसुकै मूल्य चुकाउन पनि तयार रहेको बताइन् ।

प्रदर्शनका क्रममा विद्यार्थीहरूले ‘घरमा हाम्रो बास छैन, किनभने ग्यास छैन’ लगायतका नारा लगाएका थिए । 

विद्यार्थी संगठनहरूले ग्यासको सहज आपूर्ति नभएसम्म आन्दोलनलाई थप सशक्त बनाउने चेतावनीसमेत दिएका छन्।

तस्बिर : नेपाल फोटो लाइब्रेरी