काठमाडौं – नायक कर्मा शाक्य र नायिका परीक्षा लिम्बू शीर्ष भूमिकामा रहेको फिल्म ‘हिमालयन गोल्ड’ मंसिर ४ बाट प्रदर्शनमा आउने भएको छ । निर्माण पक्षले प्रेस विज्ञप्ति र पोस्टर सार्वजनिक गरी प्रदर्शन मितिबारे जानकारी दिएको हो ।

यस ‘हिमाली सर्वाइभल थ्रिलर’ फिल्मले हिमाली भेगमा पाइने बहुमूल्य जडीबुटी यार्चागुम्बा लागि हुने अपराधको कथा समेटेको छ ।

लेजेन्ड कलाकार सुनील थापाको यो अन्तिम फिल्म हो । उनको केही महिनाअघि मृत्यु भएको हो । रिलिजका हिसाबले उनको यो नै अन्तिम फिल्म हुनेछ ।

निर्माण पक्षका अनुसार फिल्मको शीर्ष भूमिकामा रहेकी नायिका परीक्षाले सोनम नामकी युवतीको भूमिका निर्वाह गरेकी छन् । फिल्ममा समावेश भावनात्मक र नाटकीय अवस्थाहरूको केन्द्रीय कारक उनै हुन् ।

फिल्ममा कर्मा विलकुल फरक भूमिकामा रहेका छन् । उनको लुक्स नै फिल्मको प्रमुख आकर्षण मध्य एकमा पर्छ ।

प्रदर्शन मिति सार्वजनिक गर्दै निर्माण पक्षले एक पोस्टर पनि सार्वजनिक गरेको छ । पोस्टरमा यार्चागुम्बालाई तस्बिर मात्रै राखिएको छ ।

यही फिल्मबाट धिराज राजवंशीले निर्देशनमा डेब्यू गरेका छन् ।‍