काठमाडौं– चीनले नेपाललाई उपलब्ध गराएको आपत्कालीन राहत सामग्रीको पाँचौँ खेप शुक्रबार काठमाडौं आइपुगेको छ।

चिनियाँ जनमुक्ति सेनाको वायुसेनाको वाई–२०ए ठूलो क्षमताको मालवाहक विमानमार्फत शुक्रबार दिउँसो राहत सामग्री त्रिभुवन अन्तर्राष्ट्रिय विमानस्थलमा ल्याइएको हो।

राहत सामग्री हस्तान्तरण समारोहमा नेपालका लागि चिनियाँ राजदूत झाङ माओमिङ र नेपालका विज्ञान, प्रविधि तथा नवप्रवर्तनमन्त्री महावीर पुन सहभागी भएका थिए।

चिनियाँ दूतावासका अनुसार नेपालमा विपद् व्यवस्थापन तथा खोज, उद्धार र राहतका काम अघि बढिरहेका बेला तत्काल आवश्यकतालाई ध्यानमा राखेर यसपटकको सामग्री पठाइएको हो।

पाँचौँ खेपमा डिजेल जेनेरेटर, चिकित्सकीय सुरक्षात्मक मास्क, शव संरक्षणका लागि प्रयोग हुने फ्रिजर, डीएनए परीक्षणका उपकरण तथा रिएजेन्ट र पानीमा उद्धारका लागि आवश्यक उपकरणलगायत सामग्री छन्।

यी सामग्रीले विपद्पछिका थप खोज, उद्धार तथा व्यवस्थापनका काम प्रभावकारी रूपमा अघि बढाउन नेपाललाई सहयोग पुग्ने चिनियाँ दूतावासले जनाएको छ।