काठमाडौँ । रुकुम पश्चिमस्थित चौरजहारी नगरपालिकाका नगर प्रमुख (मेयर) पुष्प वादीले सफाइ पाएका छन्।

सव इन्जिनियरको करार अवधि थपका लागि एक लाख रुपैयाँ घुस लिएको आरोपमा अख्तियारले २०८२ चैतमा उनी र उनलाई घुस दिएको भन्दै उजुरी दिने असिस्टेन्ट सब–इन्जिनियर मोहन शाहविरुद्ध विशेष अदालतमा भ्रष्टाचार मुद्दा दायर गरेको थियो।

आरोप दाबी पुष्टि नभएको भन्दै विशेष अदालतका न्यायाधीश वासुदेव आचार्य, हेमन्त रावल र विदुर कोइरालाको इजलासले मंगलबार दुवै जनालाई सफाइ दिएको हो।

विगत ८ वर्षदेखि चौरजहारी नगरपालिकामा करार सेवामा कार्यरत शाहले आर्थिक वर्ष २०८१/०८२ को म्याद थप गर्ने क्रममा मेयर वादीलाई १ लाख रुपैयाँ घुस दिएको आरोप लगाएका थिए।

आर्थिक वर्ष २०८२/०८३ को करार नवीकरण गर्ने बेला पनि मेयर वादीले फेरि १ लाख रुपैयाँ घुस मागेको र आफूले नदिएपछि करार अवधि थप नभएको आरोप उनले लगाएका थिए।

उनले पहिले आफूले घुस वापत एक लाख रुपैयाँ बैंकमा जम्मा गरिदिएको भौचर पनि पेस गरेका थिए।

तर घुस लिने र दिने दुवै भ्रष्टाचारी ठहरिने भन्दै अख्तियारले उजुरीकर्ता शाहलाई पनि प्रतिवादी बनाएर मुद्दा दायर गरेको थियो।

मेयर वादीले भने एक लाख रुपवैयाँ सापटी लिएको र उक्त रकम फिर्ता गरिसकेको दाबी गरेका छन्। मेयर वादी यो मुद्दा दायर भएपछि मेयर निलम्बित भएका थिए। अब सफाइ पाएसँगै काममा फर्किने वादीले बताए।