वासिङ्टन डीसी- अमेरिकी राष्ट्रपति डोनाल्ड ट्रम्पले इरानले अमेरिकामाथि पुर्‍याएको क्षतिको क्षतिपूर्ति इरानले नै तिर्नुपर्ने बताएका छन्।

ओभल अफिसमा पत्रकारहरूसँग कुरा गर्दै ट्रम्पले स्ट्रेट अफ हर्मुजमा अमेरिकी नौसेनाको नाकाबन्दी कायम रहेको र उक्त जलमार्ग अहिले ‘शतप्रतिशत’ अमेरिकी नियन्त्रणमा रहेको दाबी गरे।

इरानसँगको पछिल्लो तनाव र असमझदारीबारे बोल्दै ट्रम्पले तेहरानले अमेरिकी कारबाहीका कारण भएको क्षतिको क्षतिपूर्ति मागिरहेको उल्लेख गरे। त्यसको जवाफमा अमेरिकाले पनि इरानसँग क्षतिपूर्ति माग गर्ने उनले बताए।

यसअघि ट्रम्पले अमेरिका–इजरायलको सैन्य कारबाहीका क्रममा इरानमा भएको आर्थिक क्षतिका लागि तेहरानले गरेको क्षतिपूर्तिको माग अस्वीकार गरेका थिए। बरु, इरानले आफ्नै गतिविधिका कारण हुने मानवीय तथा भौतिक क्षतिको जिम्मेवारी लिनुपर्ने उनको भनाइ थियो।

सामाजिक सञ्जालमा इरानको क्षतिपूर्ति मागलाई ‘रोचक विचार’ भन्दै ट्रम्पले भविष्यमा हुने कूटनीतिक वार्तामा अमेरिकाले पनि आफ्नो प्रति–माग प्रस्तुत गर्ने संकेत गरेका छन्।

स्ट्रेट अफ हर्मुज विश्वकै प्रमुख ऊर्जा आपूर्ति मार्गमध्ये एक भएकाले त्यहाँको सुरक्षा र आवागमनमा उत्पन्न कुनै पनि अवरोधले अन्तर्राष्ट्रिय ऊर्जा बजारमा समेत प्रभाव पार्न सक्ने चिन्ता बढेको छ।