काठमाडौं – श्रम संस्कृति पार्टीका अध्यक्ष हर्क साम्पाङले सरकारले जनताको पीडा महसुस गर्न नसकेको आरोप लगाएका छन् ।

मंगलबार प्रतिनिधिसभाको बैठकमा बोल्दै अध्यक्ष साम्पाङले जनताले देशमा सुरक्षा, न्याय र आवश्यक सेवा–सुविधा पाउन नसकेको बताए। ग्यासका लागि समेत घण्टौँ घाममा उभिनुपर्ने अवस्था रहँदा सरकारले जनताको पीडा महसुस गर्न नसकेको उनको भनाइ थियो ।

ठूलो आशा र अपेक्षाका साथ जनताले वर्तमान सरकारलाई मत दिए पनि सरकारले अपेक्षाअनुसार परिवर्तन ल्याउन नसकेको साम्पाङले बताए। सरकारका मन्त्रीहरूबीच नै आवश्यक समन्वय र विश्वासको कमी देखिएको उनको आरोप थियो ।

देशभित्र पर्याप्त अवसर सिर्जना हुन नसक्दा युवाहरू विदेशिन बाध्य भएको भन्दै उनले वैदेशिक रोजगारीका नाममा भइरहेको ठगी नियन्त्रण गर्न तथा ठगीमा संलग्नलाई कारबाही गर्न सरकार असफल भएको बताए ।

अध्यक्ष साम्पाङले विगत साढे दुई महिनादेखि संसदमा प्रधानमन्त्रीको उपस्थितिको माग गरिए पनि प्रधानमन्त्री बैठकमा उपस्थित नभएको भन्दै असन्तुष्टि व्यक्त गरे।

प्रधानमन्त्रीको संसद्‌मा उपस्थित नहुनुलाई उनले ‘बालहठ’ र ‘पदीय गैरजिम्मेवारी’को संज्ञा दिए । संसद्प्रति सरकार र प्रधानमन्त्रीको जवाफदेहिता आवश्यक रहेको उनको भनाइ थियो ।