तौलिहवा – तौलिहवा–भैरहवा सडकखण्ड अन्तर्गत कपिलवस्तु नगरपालिका–७ धरमपनियामा मिनी ट्रकसँग मोटरसाइकल ठोक्किँदा एक जनाको मृत्यु भएको छ। दुर्घटनामा अन्य दुई जना घाइते भएका छन्।

सडक छेउमा बिग्रिएर बनाउँदै गरिएको ना ६ ख ६४२३ नम्बरको टाटा मिनी ट्रकको पछाडि लु ८२ प ८६२८ नम्बरको १५० सीसीको बजाज पल्सर मोटरसाइकल ठोक्किएको हो।

दुर्घटनामा गम्भीर घाइते भएका मोटरसाइकल चालक शुद्धोधन गाउँपालिका–३ कटैयाभारीका २३ वर्षीय सन्तोष कहारको उपचारका क्रममा जिल्ला अस्पताल तौलिहवामा राति ११:१३ बजे मृत्यु भएको प्रहरीले जनाएको छ।

मोटरसाइकलमा सवार कपिलवस्तु नगरपालिका–७ पिपरहवाका ३२ वर्षीय शेषराम पासी र २५ वर्षीय दुर्गेश यादव घाइते भएका छन्। उनीहरू दुवै जनाको बुटवलस्थित चौराहा अस्पतालमा उपचार भइरहेको छ।