काठमाडौं- बङ्गलादेशको मयमनसिंह क्षेत्रमा एक मस्जिदभित्र नाबालिकालाई बलात्कार गरेको आरोपमा एक जना इमाम पक्राउ परेका छन् । स्थानीय सञ्चारमाध्यमका अनुसार स्थानीय बासिन्दाले ती आरोपितलाई नियन्त्रणमा लिएर कुटपिट गरेपछि प्रहरीलाई बुझाएका थिए ।

त्रिशाल प्रहरीका प्रमुख मन्सुर अहमदले घटनाका सम्बन्धमा पीडित बालिकाका पिताले उजुरी दर्ता गराएको जानकारी दिएका छन् । पक्राउ पर्नेमा ४५ वर्षीय मौलाना शाहिनुर इस्लाम रहेका छन् ।

प्रहरीका अनुसार ती बालिका विगत तीन महिनादेखि मस्जिदमा ती इमामसँग पढ्न जाने गरेकी थिइन् । शनिबार समयमै छोरी घर नफर्किएपछि खोज्दै गएकी आमाले मस्जिदमा इमामलाई आपत्तिजनक अवस्थामा भेटेपछि हल्लाखल्ला गरेकी थिइन् ।

त्यसपछि स्थानीय बासिन्दाहरू तुरुन्तै मस्जिदमा भेला भई आरोपितलाई समातेर कुटपिट गरेका थिए र पछि प्रहरीको जिम्मा लगाएका थिए ।

पीडित बालिकाकी आमाले आफ्नी निर्दोष छोरीमाथि यस्तो कुकृत्य गर्नेलाई मृत्युदण्डसहितको कडाभन्दा कडा सजाय हुनुपर्ने माग गरेकी छन्।