काठमाडौं– राष्ट्रिय प्रजातन्त्र पार्टी संसदीय दलका नेता ज्ञानेन्द्र शाहीले बालेन्द्र शाह यस अघि काठमाडौं महानगरको मेयर भएको कारण काठमाडौंमा गरिब दुःखी बाँच्न नपाउने अवस्था बनेको बताएका छन् ।

शुक्रबार प्रतिनिधिसभामा बोल्दै शाहीले गणेश नेपालीको आत्मदाह प्रसंगसँग जोडेर अघिल्लो पटक मेयर बनेकै कारणले यो अवस्था सिर्जना भएको बताएका हुन् ।

‘यो गरिब, दुःखी र निमुखा जनताको पनि सहर हो वा होइन ? यदि गरिब, दुःखी जनताको सहर हो भने यो नेपालको राजधानी किन हो ? नेपालको राजधानी हो भने यो गरिब, दुःखी, सर्वहारा वर्गको र जनताको पनि सहर हो’, उनले भने, ‘आज गरिब, दुःखी जनता यो सहरमा बाँच्न नपाउने भैसके अघिल्लो पटक मेयर भएका कारणले गर्दा यो अवस्था आज सिर्जित बनेको छ ।’

शाही संसदमा सरकार अरबपति र करोडपतिलाई नचाहिने भन्दै सरकार गरिब, निमुखा र अपहेलितलाई चाहिने बताए । अहिलेको सरकारको नीति भने उल्टो भएको उनको भनाइ छ ।

‘आज सरकारका ऐन, नीति, नियमहरू हेर्दा सुविधा र व्यवस्था हुने खाने अरबपतिको पक्षमा केन्द्रित देखिन्छ, म नियम, ऐन, मन्त्रिपरिषद्का निर्णय ल्याएर पढाउन सक्छु’, उनले भने, ‘जसको खल्तिमा पैसा छ उसले नेपालमा बाँच्न पाउँछ, जसको खल्तिमा पैसा छैन, उसको जीवनको कुनै मूल्य छैन भन्ने जस्ता शन्देशहरू सरकारका नीति तथा कार्यक्रमहरूले दिइरहेका छन् ।’