काठमाडौँ – नेपाल बाल संगठन (बाल मन्दिर) मा भएको ठगी सम्बन्धी कसूरमा संलग्न रहेको आरोपमा प्रहरीले तीन जनालाई पक्राउ गरेको छ । नेपाल प्रहरीको केन्द्रीय अनुसन्धान ब्यूरो (सीआईबी) ले बाल मन्दिरबाट अनियमित रूपमा रकम लिई ठगी गरेको मुद्दाको अनुसन्धानका क्रममा उनीहरूलाई विभिन्न स्थानबाट पक्राउ गरेको हो ।

उच्च स्तरीय जाँचबुझ आयोगको प्रतिवेदन, २०७७ र प्रहरी प्रतिवेदनका आधारमा काठमाडौं जिल्ला अदालतबाट अनुमति लिएर ब्यूरोले उनीहरूलाई असार २४ गते पक्राउ गरेको जनाएको छ । पक्राउ पर्नेहरूमा बाल मन्दिर नक्सालकी तत्कालीन योजना तथा छात्रवृत्ति शाखा प्रमुख ५४ वर्षीया आशा श्रेष्ठ, नेपाल बाल संगठन जिल्ला कार्यसमिति ललितपुरका तत्कालीन सभापति ६२ वर्षीय ओमकृष्ण कर्माचार्य र जिल्ला कार्यसमिति काठमाडौंका तत्कालीन सचिव ५१ वर्षीय राजेन्द्र कुमार श्रेष्ठ रहेका छन् ।

ब्यूरोका प्रवक्ता एवं प्रहरी वरिष्ठ उपरीक्षक अनुपम शमशेर जवराका अनुसार पक्राउ परेका तीनै जनामाथि काठमाडौं जिल्ला अदालतबाट म्याद थप अनुमति लिई थप अनुसन्धान कार्य जारी राखिएको छ ।