काठमाडौं – ‘नेपाली ब्रो’ नामले चिनिने कुमार थापालाई पत्नी हत्या आरोपमा थप अनुसन्धानका लागि ५ दिन हिरासतमा राख्न अदालतले अनुमति दिएको छ ।

काठमाडौँ जिल्ला अदालतका न्यायाधीश पिताम्बर शर्माको इजलासले बुधबार उक्त आदेश दिएको हो । यससँगै थापालाई दोस्रो पटक थप पाँच दिन प्रहरी हिरासतमा राखेर अनुसन्धान गर्न बाटो खुलेको छ । यसअघि दिइएको म्याद सकिएपछि उनलाई प्रहरी वृत्त बालाजुले अदालतमा पेश गरेको थियो ।

प्रहरीको प्रारम्भिक अनुसन्धान अनुसार जेठ २२ गते राति थापाले आफ्नी पत्नी ईश्वरी भुजेलको हत्या गरेका थिए । घटनामा संलग्न भएको आरोपमा थापाकी प्रेमिका सहित थप तीन जनालाई पनि प्रहरीले नियन्त्रणमा लिएर अनुसन्धान अघि बढाइरहेको छ ।

मृतक भुजेल नेपाली सेनामा सुवेदार पदमा कार्यरत थिइन् । प्रारम्भिक अनुसन्धानले घरायसी विवादकै कारण हत्या भएको संकेत गरेको जिल्ला प्रहरी परिसर काठमाडौँका एसपी पवन भट्टराईले बताए । उनका अनुसार दम्पतीबीच सम्बन्ध अत्यन्तै तनावपूर्ण र कटुतापूर्ण रहेको देखिएको छ ।