काठमाडौं– औषधि व्यवस्था विभागले क्यान्सर उपचारमा प्रयोग हुने केही महत्त्वपूर्ण औषधिको बजारमा सीमित उपलब्धता रहेको जनाउँदै बिरामीको उपचारमा सहजता ल्याउन ती औषधि उपलब्ध रहेका स्वास्थ्य संस्था तथा आपूर्तिकर्ताको सूची सार्वजनिक गरेको छ ।

विभागले मंगलबार एक सूचना जारी गर्दै विश्वव्यापी आपूर्ति शृङ्खलामा देखिएको अवरोध लगायत विभिन्न कारणले सिस्प्लेटिन इंजेक्शन र कार्बोप्लाटिन इंजेक्शन जस्ता क्यान्सर उपचारमा प्रयोग हुने औषधिको उपलब्धता प्रभावित भएको जनाएको छ ।

विभागका अनुसार औषधिको नियमित आपूर्ति सुनिश्चित गर्न सम्बन्धित निकाय, आयातकर्ता तथा सरोकारवालासँग आवश्यक समन्वय भइरहेको छ । हाल औषधि उपलब्ध रहेका स्वास्थ्य संस्था तथा कम्पनीहरूसँग समन्वय गरी बिरामीलाई आवश्यक औषधि उपलब्ध गराउन अनुरोध गरिएको छ ।

सूचनामा नेपालगञ्जस्थित मा जानकी अस्पताल, विराटनगरस्थित विराट मेडिकल कलेज शिक्षण अस्पताल, बिर्तामोडस्थित पूर्वाञ्चल क्यान्सर अस्पताल, पोखरास्थित विभिन्न औषधि कम्पनी, धरानको पुनम फार्मेसी, भरतपुरको राज ड्रग प्रालि तथा काठमाडौंका ताज नेपाल,  फार्मास्युटिकल्स, सिजल फार्म र अनमोल हेल्थ केयर लगायत संस्थामा उक्त औषधि उपलब्ध रहेको उल्लेख गरिएको छ ।

विभागले सम्बन्धित स्वास्थ्य संस्थालाई औषधिको मौज्दात तथा वितरणको स्पष्ट अभिलेख राख्न पनि निर्देशन दिएको छ । साथै औषधि प्राप्त गर्न आवश्यक परे सम्बन्धित संस्थाका सम्पर्क व्यक्तिसँग समन्वय गर्न र थप जानकारीका लागि विभागमा सम्पर्क गर्न सकिने जनाएको छ ।

क्यान्सर उपचारका लागि अत्यावश्यक मानिने यी औषधिको आपूर्ति प्रभावित हुँदा बिरामी तथा अस्पतालहरूमा चिन्ता बढिरहेका बेला विभागले उपलब्ध स्रोतको विवरण सार्वजनिक गर्दै उपचारमा निरन्तरता दिन पहल गरेको हो ।