काठमाडौं- नेपाल प्रहरीको केन्द्रीय अनुसन्धान ब्यूरो (सीआईबी) ले राजश्व चुहावट र ठगी मुद्दामा सजाय तोकिएर फरार रहेका दुई प्रतिवादीलाई पक्राउ गरेको जनाएको छ।

सीआईबीका अनुसार राजश्व चुहावट मुद्दामा उच्च अदालत पाटनको २०८१ वैशाख १७ गतेको फैसलाले ४ करोड ४४ लाख ८७ हजार ९५७ रुपैयाँ जरिवाना र १ वर्ष कैद सजाय तोकिएका सर्लाही ब्रह्मपुरी नगरपालिका–२ स्थायी घर भई काठमाडौंको कुलेश्वर बस्दै आएका ३१ वर्षीय प्रविण कुमार महतोलाई पक्राउ गरिएको हो।

उनलाई चैत २७ गते कुलेश्वरबाट पक्राउ गरी फैसला कार्यान्वयनका लागि जिल्ला अदालत ललितपुरमा उपस्थित गराइएको सीआईबीले जनाएको छ।

यस्तै, ठगी मुद्दामा उच्च अदालत पाटनको २०८२ वैशाख २ गतेको फैसलाले २५ हजार रुपैयाँ जरिवाना र २ वर्ष ६ महिना कैद सजाय तोकिएका बाग्लुङ घर भई काठमाडौंको सामाखुसी बस्दै आएका ५२ वर्षीय महेन्द्र केसीलाई पनि पक्राउ गरिएको छ।

युनिटी लाइफ इन्टरनेशनल लिमिटेडका सञ्चालकसमेत रहेका केसीलाई चैत २७ गते सामाखुसीबाट पक्राउ गरी फैसला कार्यान्वयनका लागि ललितपुर जिल्ला अदालतमा पेश गरिएको प्रहरीले जनाएको छ। प्रहरीका अनुसार दुवै प्रतिवादीलाई आवश्यक कानुनी प्रक्रिया अघि बढाइएको छ।