काठमाडौं – गत वर्षको दशैँमा प्रदर्शनमा आएको ‘१२ गाउँ’ ब्लकबस्टर रापतापमा नायक विराज भट्टले साइन गरेको फिल्म ‘राम नाम सत्य’ शुक्रबारबाट हलमा लागेको छ ।

नयाँ वर्ष लक्षित गरी प्रदर्शनमा आएको ‘राम नाम सत्य’ले शुक्रबारका लागि १५० भन्दा बढी शो पाएको थियो । सोलो रिलिज भएको यस फिल्मलाई हलमा दर्शक तान्न थप सहज छ । हलमा यो एक मात्रै फिल्म हो । चर्चामा रहेका विदेशी फिल्म पनि हलमा छैनन् ।

तर, ‘राम नाम सत्य’को ओपनिङ कमालको छैन । दुई-चार हल हाउसफुल भए अन्यमा अकुपेन्सी कमजोर नै देखिन्छ । ठूलो ओपनिङ कलेक्सन हुने संकेत छैन ।

दोस्रो दिन शनिबारका लागि हलहरूले २०० भन्दा बढी शो छुट्याएका छन् । सार्वजनिक बिदाको दिन पनि यो फिल्मको बुकिङ उत्साहजनक छैन ।

शुक्रबार साँझसम्मको व्यापार-बुकिङ र शनिबारको बुकिङ हेर्दा यो फिल्म हिट हुन ‘माउथ पब्लिसिटी’को आवश्यक पर्ने देखिन्छ ।

अर्थात, शुक्रबार र शनिबारका दर्शकले दिने ‘पोजेटिभ वर्ड अफ माउथ’का कारण यो फिल्मको व्यापार निर्धारण हुने देखिन्छ ।

ओपनिङ कमजोर हुनुलाई फिल्मको प्रचार सामग्रीले तान्न सकेन भन्ने बुझ्न सकिन्छ । तर, दर्शकले मन पराउने फिल्मको प्रचार सामाग्री पनि कमजोर हुन सक्छन् ।

आइतबार र सोमबारदेखि दर्शकको सङ्ख्या बढेर हिट भएका फिल्महरू पनि छन् । यो कुरा ‘राम नाम सत्य’को हकमा लागु हुने सम्भावना उत्तिकै छ ।

तथापि, फिल्मको कमजोर व्यापार विराज भट्टले आफ्नो स्टारडम ओपनिङमा देखाउन भने नसकेको प्रष्ट पारेको छ ।

यस फिल्ममा नायक विराज भट्टका साथमा नायक सुशील श्रेष्ठ, नायिकाहरू सुपुष्पा भट्ट र दिव्या रायमाझी छन् । माइकल चन्दको निर्देशनमा फिल्म बनेको हो ।