काठमाडौं– प्रतिपक्षी दल नेकपा एमालेले शुक्रबार जारी उपसभामुखको निर्वाचनमा आफूलाई तटस्थ राखेको छ।

प्रतिनिधिसभाको उपसभामुख निर्वाचनका लागि डाकिएको संसद् बैठकलाई सम्बोधनका क्रममा एमाले सांसद मोहम्मद इस्तियाक राईले यसबारे जानकारी दिएका हुन् ।

‘उपसभामुखको निर्वाचनमा एमालेले तटस्थ बस्ने निर्णय गरेको छ’, उनले भने, ‘हाम्रो उम्मेदवारी पनि नरहेकाले हामीले कसैको पक्षमा मतदान नगर्ने निर्णय गरेका छौँ ।’

एमाले अहिले प्रतिनिधि सभामा २५ जना सांसदसहित तेस्रो दलको हैसियतमा छ । ३७ सिटसहित कांग्रेस प्रमुख प्रतिपक्षी दलका रुपमा छ ।

यस पटक उपसभामुख पदमा राष्ट्रिय स्वतन्त्र पार्टीको समर्थनसहित श्रमसंस्कृति पार्टीकी रुबीकुमारी ठाकुर मैदानमा छिन् । उनले जित्ने पक्का भइसकेको छ। उता राष्ट्रिय प्रजातन्त्र पार्टीले सरस्वती लामालाई उम्मेदवार बनाएको छ। राप्रपाको पक्षमा अन्य कुनै दल उभिएका छैनन् ।