काठमाडौं- राष्ट्रिय प्रजातन्त्र पार्टी (राप्रपा) की सांसद खुश्वु ओलीले राष्ट्रिय स्वतन्त्र पार्टी (रास्वपा) प्रति विश्वास गर्न नसकिने उदाहरण यस पटक बनेको बताएकी छन् ।

प्रतिनिधिसभाको उपसभामुख निर्वाचनका लागि डाकिएको संसद् बैठकलाई शुक्रबार सम्बोधनका क्रममा उनले यस्तो बताएकी हुन् ।

सम्बोधनका क्रममा ओलीले रास्वपाले सुरूबाटै आफूहरूलाई सघाउने बचन दिएर अन्तितममा धोका दिएको बताइन् । उनले राप्रपालाई सघाउने भनिसकेर अन्तिममा अर्कै उम्मेदवार (श्रमसंस्कृतिकी रूबीकुमारी ठाकुर) लाई उपसभामुखका समर्थन गरेको भन्दै असन्तुष्टि जनाइन्।

उपसभामुख पदका लागि राप्रपाबाट सरस्वती लामा र श्रम संस्कृति पार्टीबाट रुबीकुमारी ठाकुर उम्मेदवार छन्। यस्तोमा राप्रपा उम्मेदवार लामाको पक्षमा समर्थन व्यक्त गर्दै ओलीले रास्वपाप्रति रोष प्रकट गरेकी हुन् । यसअघि सुरूमा खुश्वु नै राप्रपाबाट उपसभामुखको उम्मेदवार बन्ने चर्चा थियो ।

रास्वपा सभापति रवि लामिछानेले सहयोग गर्ने प्रतिबद्धता दिएकै कारण राप्रपाले उम्मेदवारी दर्ता गराएको पनि उनले उल्लेख गरिन् ।

‘राष्ट्रिय स्वतन्त्र पार्टीले आफ्नो उदाउँदै गरेको राजनीतिक यात्रामै आफ्नै शब्द र प्रतिबद्धताप्रति विश्वास गर्न नसकिने नजीर प्रस्तुत गरेको छ’, धोका पाएको बताउँदै उनले भनिन्, ‘रास्वपाले सुरूमै पुरानै दलको प्रवृत्ति देखाएको छ ।’