काठमाडौं– कानुन विपरीत औषधिको मूल्यवृद्धिसम्बन्धी प्रकरणमा औषधि व्यवस्था विभागका महानिर्देशक नारायण ढकाल छानविनको दायरामा परेका छन् । 

बिहीबार प्रधानमन्त्री कार्यालयले स्वास्थ्य मन्त्रालयलाई तत्काल छानविन गर्न निर्देशन दिएको छ । प्रधानमन्त्री कार्यालयले स्वास्थ्य सचिवलाई पत्राचार गर्दै ७ दिनभित्र छानविन सम्पन्न गरी प्रतिवेदन पेश गर्न निर्देशन दिएको हो । 

सो निर्देशनपछि ढकाललाई मन्त्रालयमा तानिएको छ । पत्रमा प्रचलित कानूनले तोकेको प्रक्रिया पूरा नगरी औषधिको मूल्य वृद्धि गरिएको भनी प्रधानमन्त्री कार्यालयमा उजुरी परेको उल्लेख गरिएको छ । 

साथै, औषधिको मूल्य निर्धारण प्रक्रिया के हो, सो प्रक्रिया पालना गरिएको छ वा छैन, तथा मूल्य निर्धारणमा कुनै अनियमितता भए त्यसमा कस–कसको संलग्नता छ भन्ने विषयमा विस्तृत छानविन गर्न भनिएको छ । 

यसका लागि विषयगत विज्ञहरू समेटिएको तीन सदस्यीय छानविन समिति गठन गरी निर्धारित समयभित्र प्रतिवेदन बुझाउन मन्त्रालयलाई निर्देशन दिइएको छ ।