काठमाडौं- नेकपा एमालेका नेता विष्णु रिमालले पार्टी फेरि पनि धुलो टक्टकाउँदै दृढतासहित उठ्ने दाबी गरेका छन् ।

फागुन २१ को चुनावमा केबल ९ सिटमा खुम्चिएको एमाले फेरि उठ्ने जिकिर अध्यक्ष केपी शर्मा ओलीनिकट रिमालले गरेका हुन् ।

एमालेका विजयी सांसदहरूलाई बधाई दिँदै रिमालले यस्तो बताएका हुन्। यो चुनाव अन्तिम नभएको बताएका उनले संखुवासभाको परिणाम यस निर्वाचनको अन्तिम परिणाम मात्रै भएको जिकिर गरेका छन्। 

एउटा लडाइँमा भएको हार समग्र युद्धको पराजय मान्न नसकिने उनले बताए । ‘यो चुनाव अन्तिम होइन। संखुवासभाको परिणाम यसपटकको निर्वाचनको अन्तिम परिणाम मात्र हो,’ रिमालले लेखेका छन्, ‘एउटा लडाइँमा भएको हार समग्र युद्धमा पराजय हुँदैन। एमाले फेरि पनि धुलो टक्टकाउँदै दृढताका साथ उठ्नेछ।’

विभिन्न चुनौतीहरूबी एमाले उम्मेदवारहरूले हासिल गरेको सफलता गर्विलो रहेको उनले बताए । ‘सूर्यध्वजावाहक उम्मेदवारसहित प्रतिनिधिसभा निर्वाचनमा विजयी सम्पूर्ण माननीय सदस्यहरूलाई हार्दिक बधाई तथा सफल कार्यकालको शुभकामना’, उनले भनेका छन् ।