काठमाडौं- राष्ट्रिय स्वतन्त्र पार्टी (रास्वपा) का सांसद राजुनाथ पाण्डेले वरिष्ठ नेता बालेन्द्र साहलाई प्रधानमन्त्री नबनाउने कुरा हल्ला मात्रै भएको तर्क गरेका छन् ।

मंगलबार सञ्चारकर्मीसँगको कुराकानीका क्रममा उनले पार्टीको पुस १३ को सहमति, आधिकारिक लाइन र जनताको म्यान्डेट बालेनकै पक्षमा रहेकाले उनै प्रधानमन्त्री हुने जिकिर गरे ।

‘राष्ट्रिय स्वतन्त्र पार्टीबाट प्रधानमन्त्रीको उम्मेदवार वरिष्ठ नेता बालेन्द्र साह नै हुन्। यसमा शंका छैन। गैरजिम्मेवार र नचाहिने कुरा कसैले गर्छ भने त्यो सह्य हुनेछैन, जनताले पनि मान्दैनन्’, उनले चेतावनीको शैलीमा भने ।

पार्टीका पदाधिकारी र सदस्यहरूलाई आधिकारिक लाइन बाहिर गएर बोल्ने छुट पनि नभएको पाण्डेले बताए ।

सभापति-उपसभापति कसैले पनि बालेनको विकल्प नखोजेको बताउँदै उनले हल्लामा आएका कुरा निराधार भएको तर्क गरे।

‘पार्टीको लाइनभन्दा बाहिर गएर मान्छेअनुसार कुरा नगर्न म अनुरोध गर्छु। मिडियामा बोल्दा सम्यमित हुनुपर्छ। यो पार्टीभित्रको सुशासनको सवाल पनि हो ।’

उनले सुशासनबारे राजनीतिज्ञलाई मात्रै गाली गरेर नपुग्ने बताउँदै कर्मचारीतन्त्रको कार्यशैलीमा पनि व्यापक परिवर्तन चाहिएको जिकिर गरे ।

‘हामीलाई सुशासन चाहिएको छ। सरकारी कार्यालयमा जाँदा नागरिकले सुशासन महसुस गर्नुपर्छ। अब सुशासनका लागि निर्मम बनेर अगाडि बढ्छौं,’ पाण्डेले भने ।