दोलखा– जिल्लामा प्रतिनिधिसभा निर्वाचनमा २०८२ मा प्रत्यक्ष सहभागी बनेर मतदान गरेका ८४ हजार ४ सय ४१ मत मतदाता मध्ये सात हजार बढी मत बदर (रद्द ) गरिएको छ ।

समानुपातिक तथा प्रत्यक्ष दुवै तर्फको ७ हजार ४ सय ४८ मत बदर भएको छ । जिल्लामा कुल मतदाता संख्या एक लाख ७० हजार ३२१ रहे पनि निर्वाचनमा ८४ हजार ४ सय ८१ जना मात्रले मत दान गरेकोमा प्रत्यक्ष तर्फ खसेको मतको ५दशमलव ३ र समानुपातिक प्रणालीको ३ दशमलव ५ प्रतिशत मत बदर भएको छ ।

प्रत्यक्षको चार हजार चारसय ६० र समानुपातिक तर्फको दुई हजार नौ सय ८८ मत बदर भएको जिल्ला निर्वाचन कार्यालय दोलखाले सार्वजनिक गरेको अन्तिम मत परिणाममा उल्लेख गरिएको छ ।

आयोगले प्रत्येक वडासम्म पुगेर मतदाता शिक्षा सञ्चालन गरेपनि ७ हजार बढीले अझै मत हाल्न नजानेको उक्त तथ्यांकले देखाएको छ । 

फागुन २१ को निर्वाचनलाई ३ फागुन देखि स्वयंसेवक खटाएर गाउँ-गाउँमा मतदाता शिक्षा कार्यक्रम सञ्चालन गरेको आयोगले एउटै जिल्लाका ७ हजार बढी मतदाताको मत खेर गएको जनाएको छ । मतपत्रमा एकभन्दा बढी ठाउँमा छाप लगाउने, चिन्ह बाहिर छाप लाग्ने वा अन्य प्राविधिक त्रुटिका कारण मत बदर हुने गरेको छ ।

दोलखालाई साक्षर जिल्ला घोषणा गरिसकिएको भए पनि निर्वाचनमा उल्लेख्य मात्रामा मत बदर हुनु चिन्ताको विषय बनेको छ । दोलखालाई २०७० असार १० गते साक्षर जिल्ला घोषणा गरिएको थियो ।

साक्षरता अभियानअन्तर्गत जिल्लाका १५ देखि ६० वर्ष उमेर समूहका ९५ प्रतिशतभन्दा बढी नागरिकले पढ्न–लेख्न सक्ने भएपछि साक्षर जिल्ला घोषणा गरिएको हो ।

शिक्षा र साक्षरतामा सुधार हुँदै गए पनि मतपत्र प्रयोग गर्ने प्रक्रियामा अझै स्पष्ट बुझाइ अभाव हुँदा मत बदर हुने समस्या देखिएको विश्लेषण गरिएको छ । मतदाता शिक्षाको कमीका कारण मत बदर धेरै देखिएको मुख्य निर्वाचन अधिकृतको कार्यालय दोलखाले जनाएको छ ।

निर्वाचनमा गलत ठाउँमा छाप लगाउनु, दुई वटा चिन्हमा छाप लगाउनु, वा तोकिएको मतपत्र प्रयोग नगर्नु जस्ता कारणले मतपत्र बदर हुन्छन् । कानुनी सन्दर्भमा, दर्ता वा निर्णयहरू कानुन विपरीत भएमा तिनलाई बदर (रद्द) गर्न सकिन्छ । सुवाश बस्नेत/दोलखा