काठमाडौं- नेपाली कांग्रेस बझाङ जिल्ला कार्यसमितिले एकजना कार्यकर्ता रामबहादुर महरलाई पार्टीबाट निष्कासन गरेको छ।

बझाङबाट प्रतिनिधिसभामा विजयी नेकपा एमालेका सांसद ऐन महरका बुवा रामबहादुरलाई कांग्रेसले पार्टीको साधारण सदस्यबाटै निकालिदिएको हो ।

कांग्रेसले फागुन २१ गतेको चुनावका क्रममा पार्टी अनुशासन उल्लंघन गरेको र आफ्नै उम्मेदवारलाई अन्तर्घात गरेको भेटिएपछि कारवाहीस्वरूप महरलाई निष्कासन गरेको हो ।

छोरा ऐन एमाले केन्द्रीय सदस्यसमेत छन् । उनी अनेरास्ववियुको केन्द्रीय अध्यक्ष हुँदै २०७९ मा पनि त्यहीँबाट चुनाव लडेका थिए । तर २०७९ मा नेकपा एकीकृत समाजवादीका भानुभक्त जोशीसँग पराजित उनलले यस पटक जित निकालेका छन् । छोरा एमालेको केन्द्रीय नेता भए पनि बुवा रामबहादुर भने कांग्रेसकै राजनीतिमा थिए ।

लामो समयदेखि कांग्रेसमा आबद्ध रामबहादुर नेपाल किसान संघ बझाङ जिल्ला कार्यसमितिका पूर्वसभापति समेत हुन् ।

तर उनले फागुन २१ को निर्वाचनमा एमालले उम्मेदवार छोरा ऐनलाई सघाएको आरोप लागेको छ । कांग्रेसका उम्मेदवार प्रकाश रसाइली ‘स्नेही’लाई हराउन भूमिका खेलेको प्रमाण भेटिएको भन्दै उनलाई कारबाहीस्वरुप निकालिएको हो ।

जिल्ला कार्यसमितिको अनुशासन समितिले पार्टीको विधान र आचरणविपरीत विपक्षी दलका उम्मेदवार ऐन महरको पक्षमा भोट मागेको ठहरसहित निष्कासनको निर्णय गरेको हो ।