काठमाडौं– ललितपुरका जेन-जी शहीद बिनोद महर्जनको परिवारलाई भेटघाट गर्न ललितपु-२ का प्रतिनिधिसभा सदस्य जगदीश खरेल उनको निवास ललितपुर दुपाट टोल पुगेका छन् ।
 
खरेलले गत भाद्र १९ गते आन्दोलनका क्रममा शहीद भए विनोदका ७५ वर्षीय आमा लता माया महर्जन, दिदी बिना महर्जन अवाले, दाई काजी रत्न महर्जन र बहिनीहरू सरिता र बिन्दु महर्जनलाई भेटेका हुन् ।

भेटका क्रममा पूर्व सञ्चार तथा सूचना प्रविधिमन्त्रीसमेत रहेका खरेलले अब बन्ने सरकारले भदौ २३ र २४ को घटनासम्बन्धी जाँचबुझ आयोगको प्रतिवेदन कार्यान्वयन गर्ने बताए ।  

खरेलले जेन-जी आन्दोलनको जगमा निर्वाचन भएको भन्दै अव बन्ने सरकारले जाँचबुझ आयोगको प्रतिवेदन कार्यान्वयन गर्ने बताए । 

खरेलले वर्तमान सरकारले मन्त्रिपरिषद्बाट उक्त प्रतिवेदनका बारेमा आवश्यक निर्णय गर्ने विश्वास व्यक्त गरे । आयोगले सुझाएका कुरा, सुझाव र निष्कर्षलाई कार्यान्वयन गर्नु आगामी सरकारको दायित्व समेत हुने उनको भनाइ छ ।

त्यस्तै खरेलले भ्रष्टाचार अन्त्य, सुशासन कायम र देशमा नै शिक्षा, रोजगारी, स्वास्थ्य लगायतका लागि भएको आन्दोलनको मर्मलाई गम्भीरतामा राखेर अघि बढ्ने स्पष्ट पारे । 

उनले युवाहरुले गरेको क्रान्तिलाई अव रास्वपाले पूर्णता दिने र मुलुकलाई परिवर्तन गरेरै छाड्ने धारणा राखे । 

तस्बिर : नेपाल फोटो लाइब्रेरी