काठमाडौँ – नेपाली कांग्रेसका नेता एवं अस्पताल सञ्चालक डा. सुनील शर्माले निर्वाचनपछि आर्थिक अवस्था कमजोर भएका नागरिकका लागि उपलब्ध गराइँदै आएको निःशुल्क स्वास्थ्य उपचार सेवा बन्द भएको भन्दै फैलाइएको हल्लाप्रति गम्भीर ध्यानाकर्षण भएको बताएका छन् ।

सोमबार एक सूचना जारी गर्दै उनले नोबेल मेडिकल कलेज र काठमाडौँ मेडिकल कलेज (केएमसी) सँग आबद्ध सामाजिक सेवाका कार्यक्रम निरन्तर रहने स्पष्ट पारेका हुन् । यी दुवै अस्पतालमार्फत विगतदेखि नै विपन्न नागरिकलाई लक्षित गरी छुटदेखि निःशुल्क उपचारसम्मका सेवा उपलब्ध गराइँदै आएको उनले उल्लेख गरेका छन् ।

“यस प्रकारका सेवा तथा सुविधाहरू देशका विभिन्न स्थान, सम्बन्धित वडा तथा जिल्लाहरूमा उचित प्रक्रिया र आधिकारिक माध्यममार्फत उपलब्ध गराइँदै आएको सर्वविदितै छ,” डा. शर्माले भनेका छन्, “नागरिकको आवश्यकता र आर्थिक अवस्थालाई ध्यानमा राखी सेवा पुर्‍याउने हाम्रो प्रयास सधैँ निरन्तर रहँदै आएको छ ।”

निर्वाचनको परिणाम र सामाजिक सेवा फरक विषय भएको उल्लेख गर्दै उनले अगाडि भनेका छन्, “चुनावमा हार वा जित हुनु र सामाजिक सेवा एवं सत्कर्मबीच कुनै सम्बन्ध हुँदैन, न त कहिल्यै थियो । समाज र राष्ट्रप्रतिको हाम्रो दायित्वलाई आत्मसात् गर्दै यस्ता सेवा देशभर निरन्तर जारी राख्ने कुरा जानकारी गराउन चाहन्छु ।”

उनले बजारमा फैलाइएका भ्रममा नपरी आवश्यक जानकारीका लागि सम्बन्धित वडामा रहेका संस्थाका प्रतिनिधिहरूसँग सम्पर्क गर्न र संस्थाको नियम एवं विधिअनुसार सेवा लिन अनुरोध समेत गरेका छन् ।