काठमाडौं- पाकिस्तानी सुरक्षा फौजले बलोचिस्तान प्रान्तमा थप तीन जनालाई जबरजस्ती बेपत्ता पारेका छन् । बेपत्ता पारिनेमा बलोच राष्ट्रिय अभियानका अध्यक्ष डा. नसीम बलोचका पिता र दुई जना काका छन् ।

उनीहरुलाई बलोचिस्तानको हुब चौकी क्षेत्रमा रहेका घरबाट छापा मारी नियन्त्रणमा लिइएको बलोचिस्तान पोस्टले जनाएको छ । समाचारमा जनाइएअनुसार सोमबार सुरक्षाकर्मीले बिहान साढे तीन बजे उनीहरु बसेको घरमा छापा मारेका थिए ।

बेपत्ता पारिनेमा अवकाशप्राप्त उपआयुक्त मुहम्मद बख्श साजिदी, उनका भाइ नइम साजिदी र पूर्वप्रमुख इन्जिनियर रफिक बलोच छन् । उनीहरुलाई अज्ञात स्थानतर्फ लगिएको आफन्तले जनाएका छन् ।

परिवारका अनुसार उनीहरुलाई पक्राउ गर्नुको कारणबारे केही जानकारी दिइएको छैन । बलोच राष्ट्रिय अभियानको मानव अधिकार शाखा पाङ्कले सामूहिक सजाय र जबरजस्ती बेपत्ताका घटना बढेको भन्दै चिन्ता व्यक्त गरेको छ ।