काठमाडौं- चीनमा दुई जना पत्रकार पक्राउ परेका छन् । चीनका प्रभावशाली खोज पत्रकार लिउ र उनका साझेदार वु यिङजियाओलाई पक्राउ गरिएको हो ।

उनीहरुलाई भ्रष्टाचारबारे आलेख लेखेका कारण पक्राउ गरिएको अमेरिकी अखबार न्यूयोर्क टाइम्सले जनाएको छ ।

दक्षिणपश्चिम चीनको सिचुआन प्रान्तमा भइरहेको भनिएको भ्रष्टाचारबारे आलेख प्रकाशित भएलगत्तै उनीहरुलाई पक्राउ गरिएको हो ।

सिचुआन प्रान्तको छेन्दु शहरको प्रहरीले लिउ थर भएको ५० वर्षीय र वु थर भएको ३४ वर्षीय पुरुषलाई पक्राउ गरिएको जनाएको छ । लीउका कानुन व्यवसायी झोउ जेले पक्राउमा परेकाको पहिचान पुष्टि गरेका छन् ।

पक्राउ पर्नुअघि उनीहरुले सिचुआन प्रान्तको पुजियाङ काउन्टीका स्थानीय आधिकारीले व्यवसायीसँग हेपाहा व्यवहार गरेको भन्दै आलेख छापेका थिए । हाल उक्त आलेख हटाइएको छ ।