काठमाडौं– अर्थमन्त्री रामेश्वर खनालले निष्पक्ष, भयरहित र स्वच्छ ढंगले निर्वाचन सम्पन्न गर्दै संघीयता, गणतन्त्र, लोकतन्त्रलाई संस्थागत गर्नुपर्ने बताएका छन् । 

आदिवासी जनजाति उत्थान राष्ट्रिय प्रतिष्ठानले आयोजना गरेको नेपाल आदिवासी ज्ञान सम्मेलन महोत्सव समारोह समारोहलाई मंगलबार काठमाडौंमा सम्बोधन गर्दै अर्थमन्त्री खनालले वर्तमान सरकारको लक्ष्य निष्पक्ष, भयरहित र स्वच्छ ढंगले निर्वाचन सम्पन्न गर्नुभएको भन्दै निर्वाचनपछि संघीयता, गणतन्त्र, लोकतन्त्रलाई संस्थागत गर्नुपर्ने बताएका हुन् ।

लोकतन्त्रलाई संस्थागत भए मात्रै आदिवासी जनजातिको अधिकारको रक्षा हुने उनको भनाइ छ । मन्त्री खनालले केन्द्रमा अधिकार राखेर संघीयताले काम गर्न नसक्ने उल्लेख गर्दै यसमा सबैले ध्यान दिनुपर्ने बताए ।

आगामी निर्वाचनले संघीयता, गणतन्त्र, लोकतन्त्र संस्थागत गर्न सके सबै जातजातिहरूको अधिकार, सबै जातजातिहरूको विकासको चाहना पुरा हुने उनले धारणा राखे । 

उनले आदिवासी ज्ञान सम्मेलनमा भएका छलफलको आधारमा सरकारी नीतिमा गर्नुपर्ने सुधार, स्रोतको विनियोजनमा गर्नुपर्ने सुधारको विषयमा सरकारले ध्यान दिने बताए ।