काठमाडौं– उज्यालो नेपाल पार्टीका उपाध्यक्ष तथा सुदूरपश्चिम प्रदेशसभा सदस्य डा. तारा जोशीको नेतृत्वमा २० जना केन्द्रीय सदस्यहरू राष्ट्रिय स्वतन्त्र पार्टी (रास्वपा) मै बसेका छन् ।

रास्वपा र उज्यालो नेपाल पार्टीबीच शनिबार पार्टी एकता भङ्ग हुँदा डा. जोशी समूह रास्वपामै बसेका हुन् । डा. जोशी उज्यालो नेपाल पार्टीका वार्ता संयोजक तथा दोस्रो वरीयताका नेता थिए ।

एकता टुटेपछि कुलमानले उज्यालो नेपालको अध्यक्षका रूपमा जिम्मेवारी सम्हालेका छन् । उज्यालो नेपाल पार्टीको अध्यक्ष कुलमान बन्दै गर्दा पार्टीका केही केन्द्रीय सदस्यहरू रास्वपामै रहेका हुन् ।

उज्यालो नेपाल पार्टीले ५१ सदस्यीय केन्द्रीय समिति निर्वाचन आयोगमा बुझाइसकेको छ। जसमा २० केन्द्रीय सदस्यहरू एकताको निर्णयमा रहने देखिएको हो ।