तेहरान– इरानका सर्वोच्च नेता आयतुल्लाह अली खामेनीले अमेरिकी राष्ट्रपति डोनाल्ड ट्रम्पलाई विश्वका तानाशाह र घमण्डी शासकहरूसँग तुलना गर्दै कडा चेतावनी दिएका छन् ।

सामाजिक सञ्जाल एक्समा लगातार पोस्ट गर्दै उनले ट्रम्पमाथि कडा प्रहार गरेका हुन्।

खामेनीले भनेका छन्– ‘पूरै दुनियाँबारे घमण्डका साथ निर्णय गर्ने अमेरिकी राष्ट्रपतिले इतिहास सम्झिनुपर्छ। फिरौन, निमरूद, मोहम्मद रेजा पहलवीजस्ता तानाशाहहरू आफ्नो घमण्ड चरममा पुगेकै बेला पतन भए। ट्रम्पको पनि अन्त्य त्यही हुनेछ।’

उनले इरान अहिले क्रान्तिअघि भन्दा धेरै बलियो रहेको दाबी गर्दै अमेरिका अझै पनि इरानलाई बुझ्न असफल भएको बताएका छन्।

‘आज इरान सैन्य र आध्यात्मिक रूपमा विगतको तुलनामा धेरै सशक्त छ। हाम्रो शक्ति र क्षमतालाई पुरानो इरानसँग तुलना गर्न सकिँदैन’, खामेनीले लेखेका छन्।

लाखौँ सम्मानित नागरिकको बलिदानबाट बनेको इरान कुनै पनि ‘विध्वंस मच्चाउने शक्ति’ सामु नझुक्ने अडान पनि उनले लिएका छन् ।

उनले हालैको १२ दिने युद्धको प्रसंग उठाउँदै एक हजारभन्दा बढी इरानी नागरिक मारिएको र त्यसको आदेश ट्रम्प स्वयंले दिएको दाबी गरेका छन् ।

‘अमेरिकी राष्ट्रपतिले आफैँ आदेश दिएको स्वीकार गरेका छन् । यसको अर्थ इरानीहरूको रगत उनको हातमा छ । तर अहिले उनी इरानी जनताको पक्षमा भएको नाटक गरिरहेका छन्’, उनले टिप्पणी गरेका छन्।

खामेनीले भेनेजुएलाको घटनालाई उदाहरण दिँदै ट्रम्पमाथि आक्रमण गरेका छन् । उनले लेखेका छन्, ‘ल्याटिन अमेरिकाको एक देशलाई कसरी घेराबन्दी गरियो, सबैले देखिरहेका छन्। उनीहरू खुलेआम भन्छन्, यो तेलका लागि थियो। यसमा लाजसमेत मान्दैनन्।’

खामेनीको यो टिप्पणी अमेरिका–इरानबीच बढ्दो तनावका बीच आएको हो । जसले अन्तर्राष्ट्रिय राजनीतिमा थप चासो र बहस सिर्जना गरेको छ।