काठमाडौं- भारतमा दर्जनौँ विपक्षी नेताहरु पक्राउ परेका छन् । प्रमुख निर्वाचन आयुक्त ज्ञानेश कुमारको राजीनामा माग्दै राजधानीमा प्रदर्शन चलिरहेका बेला विपक्षी नेताहरु पक्राउ परेका हुन् ।

पक्राउ पर्नेमा पश्चिम बंगालकी पूर्वमुख्यमन्त्री ममता बनर्जी, केरलाका पूर्वमुख्यमन्त्री पिनरायी विजयन्, दिल्लीका पूर्वमुख्यमन्त्री अरवीन्द केजरीवाल समेत छन् ।

यसका साथै तृणमूल कांग्रेसका नेताहरु डेरेक ओब्रायन, डोला सेन र अरु सदस्यहरु पनि पक्राउ परेको पीटीआईले जनाएको छ । उनीहरुलाई साउथ एभिन्यूबाट पक्राउ गरिएको हो ।

त्यसैगरी, वृन्दा कराट र एमए बेबीसहित भारतीय कम्युनिष्ट पार्टी मार्क्सवादीका अरु नेताहरु पनि पक्राउ परेका छन् ।

पक्राउ पर्नेमा भारतीय कम्युनिष्ट पार्टी मार्क्सवादी लेनिनवादी–लिबरेशनका नेता दिपाङ्कर भट्टाचार्य, राजनीतिक अभियन्ताहरु प्रशान्त भूषण र योगेन्द्र यादव समेत छन् । त्यस्तै, अखिल भारतीय विद्यार्थी संघकी नेतृ नेहा बोरालाई पनि पक्राउ गरिएको भारतीय सञ्चार माध्यमले जनाएका छन् ।

यसअघि प्रदर्शनको आह्वान गरेको कक्रोच जनता पार्टीका नेताहरु अभिजित दिपके, सौरभ दास र आशुतोस रंकालाई पनि प्रहरीले दिल्ली विमानस्थलबाट नियन्त्रणमा लिएको थियो ।

त्यसअघि युट्युबर ध्रुव राठीलाई पनि प्रहरीले पक्राउ गरेको थियो । प्रहरीले मुम्बईबाट भारतका राष्ट्रपिता महात्मा गान्धीका पनाती तुषार गान्धीलाई पनि पक्राउ गरेको छ ।

यसका अलावा अरु सयौँ प्रदर्शनकारीलाई पनि प्रहरीले नियन्त्रणमा लिएको छ ।

निर्वाचन आयोगका प्रमुख ज्ञानेश कुमारको राजीनामा माग्दै शनिबार कक्रोच जनता पार्टीले दिल्लीस्थित जन्तर मन्तरमा प्रदर्शनको आह्वान गरेको छ ।

प्रदर्शनलाई ध्यानमा राख्दै दिल्लीको सुरक्षा व्यवस्था चुस्त पारिएको छ भने इन्टरनेट सेवा ठप्प पारिएको छ । दिल्लीका सडकमा हजारौँ प्रहरी र अर्धसैनिक बल परिचालन गरिएको छ । प्रदर्शनका कारण सडक यातायात र रेल सेवा प्रभावित भएको छ ।