एजेन्सी – संयुक्त राष्ट्रसंघका महासचिव एन्टोनियो गुटेरेसले इथियोपियाको उत्तरी क्षेत्रमा पुनः सुरु भएको हिंसा रोक्न र तत्काल युद्धविराम गर्न सम्बन्धित सबै पक्षलाई आग्रह गरेका छन्  ।

महासचिवका प्रवक्ता स्टेफन दुजारिकका अनुसार टिग्रे, अफार र अम्हारा क्षेत्रमा पुनः लडाइँ सुरु भएपछि गुटेरेसले चिन्ता व्यक्त गरेका हुन् । उनले द्वन्द्वरत पक्षलाई तत्काल युद्धविराम गर्न र प्रिटोरिया सम्झौताअनुसार वार्तामा फर्कन आह्वान गरेका छन् ।

द्वन्द्व थप चर्किएमा क्षेत्रीय शान्ति र स्थिरतामा गम्भीर असर पर्न सक्ने भन्दै महासचिव गुटेरेसले सबै पक्षलाई संयम अपनाउन आग्रह गरेका छन् ।

उनले अन्य देशको आन्तरिक मामिलामा हस्तक्षेप नगर्न तथा सबै राष्ट्रको भौगोलिक अखण्डता र राजनीतिक स्वतन्त्रताको सम्मान गर्न पनि आह्वान गरेका छन्

त्यस्तै, द्वन्द्वरत पक्षमाथि प्रभाव राख्ने राष्ट्रहरूलाई तनाव कम गर्न सहयोग गर्न र हिंसा बढाउने गतिविधिबाट टाढा रहन महासचिवले आग्रह गरेका छन् ।

गुटेरेसले द्वन्द्वको शान्तिपूर्ण समाधानका लागि संयुक्त राष्ट्रसंघ मध्यस्थता गर्न तयार रहेको पनि स्पष्ट पारेका छन् ।