काठमाडौं– जापानमा हुने २० औँ एसियाली खेलकुदमा सहभागी हुने नेपाली खेलाडीसहित टोलीलाई बिदाइ गरिएको छ ।  

बिहीबार सिंहदरबारमा आयोजित एक कार्यक्रमकाबीच शिक्षा तथा खेलकुदमन्त्री सस्मित पोखरेलले एसियाली खेलकुदमा सहभागी हुने नेपाली खेलाडीसहित टोलीलाई बिदाइ गरेका हुन् ।

बिदाइ कार्यक्रममा मन्त्री पोखरेलले खेलाडीहरूले गरेको कडा परिश्रम, त्याग र आत्म–अनुशासनको उच्च प्रशंसा गर्दै देशको प्रतिनिधित्व गर्न पाउनु नै सबैभन्दा ठूलो गर्वको विषय भएको उल्लेख गरे । 

उनले पदक जित्नु दोस्रो प्राथमिकता रहेको तर बिना दबाब र निडर भएर खेल भावनाका साथ आफ्नो उत्कृष्ट प्रदर्शन दिन खेलाडीहरूलाई सुझाव दिए । 

इतिहासमै पहिलो पटक अन्तर्राष्ट्रिय प्रतियोगितामा जाने सबै खेलाडी तथा टोलीलाई विमानस्थलमा बिदाइ तथा स्वागत व्यवस्था मिलाइएको उनको भनाइ छ । उनले राज्यको लगानी र व्यवस्थापनमा भएका कमजोरीप्रति क्षमायाचना गर्दै आगामी दिनमा खेलाडीलाई अझ उच्च स्तरको सुविधा र सम्मान दिने प्रतिबद्धता जनाए । 

एसियाली खेलकुदमा विभिन्न २१ खेल विधामा ५७ महिला र ७८ पुरुष गरी कुल १३५ खेलाडी सहभागी हुनेछन्  । त्यस्तै २९ प्रशिक्षक, १७ व्यवस्थापक र २ खेल प्राविधिकसहित खेल टोलीमा जम्मा १८३ जना रहेका छन् ।