काठमाडौं- ल्याटिन अमेरिकी मुलुक कोलम्बियाको पश्चिमी क्षेत्रमा सोमबार ७.४ म्याग्निच्युडको शक्तिशाली भूकम्प गएको छ । अमेरिकी भौगर्भिक सर्वेक्षणका अनुसार स्थानीय समय अनुसार बिहान ७:३४ बजे गएको उक्त भूकम्पको झट्का देशका विभिन्न शहरहरूमा महसुस गरिएको थियो ।

भूकम्पको केन्द्रविन्दु राजधानी बोगोटाबाट लगभग २८० किलोमिटर पश्चिममा पर्ने चोको विभागको सान जोसे डेल पाल्मारमा १०७ किलोमिटर गहिराइमा रहेको थियो ।

भूकम्पका कारण चोको क्षेत्रमा क्षति पुगेको छ । चोकोकी गभर्नर न्युबिया क्यारोलिना कोर्डोबा कुरीले क्षेत्रीय राजधानी क्विब्डोमा केही मानिसहरू घाइते भएको र भवनहरूमा गम्भीर क्षति पुगेको पुष्टि गरेकी छन् । उनले पराकम्पहरू आउन सक्ने भन्दै चिन्ता व्यक्त गरेकी छिन् ।

यसैगरी, देशको राजधानी बोगोटामा पनि भूकम्पको कडा झट्का महसुस गरिएको थियो। झट्का लगत्तै चेतावनी साइरन बजेका थिए भने सावधानी अपनाउँदै मानिसहरू भवनहरूबाट बाहिर सडकमा निस्किएका थिए ।

बोगोटाका मेयर कार्लोस गालानले सामाजिक सञ्जाल एक्समा जानकारी दिँदै राजधानीमा अहिलेसम्म कुनै मानवीय क्षति वा ठूलो संरचनात्मक क्षतिको विवरण नआएको र केही भवनहरूमा सामान्य चर्किएको मात्र पाइएको बताएका छन् ।