काठमाडौं- नेपालस्थित भारतीय राजदूत नवीन श्रीवास्तवले प्रधानमन्त्री वालेन्द्र शाहसँग भेटेर शुभकामना सुनाएको बताएका छन्।

काठमाडौंस्थित भारतीय राजदूत श्रीवास्तवले प्रधानमन्त्री बालेन शाहसँग भेटवार्ता गरेर प्रधानमन्त्री नरेन्द्र मोदीको तर्फबाट न्यानो शुभकामना व्यक्त गरेको बताएका छन्।

गत चैत १३ गते प्रधानमन्त्री भएका वालेन्द्रले करिब ४ महिनापछि मात्रै छिमेकी देशका राजदूतसँग भेट्ने समय मिलाएका हुन् । उनले यसअघि वैशाख २८ गते नेपाल आउन लागेका भारतका विदेश सचिव विक्रम मिस्रीसँग पनि भेट्न मानेका थिएनन्।

त्यसकारण मिश्रीको प्रस्तावित नेपाल भ्रमण गत वैशाख २५ गते अन्तिम समयमा स्थगित भएको थियो। मिस्री नयाँ सरकारसँग संवाद गर्न र प्रधानमन्त्री शाहको सम्भावित भारत भ्रमणका विषयमा छलफल गर्न नेपाल वैशाख २८ गते आउने तयारीमा थिए।

तर उनै बालेन अब छिमेकी राजदूतहरूसँग प्रत्यक्ष संवाद गर्ने अवस्थामा पुगेका हुन् । नेपालमा एकपछि अर्को समस्याका कारण घेराबन्दीमा परिरहेका बेला उनले छिमेकी देशका राजदूतहरूलाई विश्वासमा लिने कोसिस थालेका हुन् ।

सोमबार बिहान करिब पौने घण्टा भएको भेटमा नेपाल-भारत सम्बन्धलाई थप सुदृढ बनाउने विषयमा छलफल भएको भारतीय राजदूत श्रीवास्तवले सामाजिक सञ्जाल एक्समार्फत् बताएका छन् ।

उनका अनुसार प्रधानमन्त्री शाहसँग भेटवार्तामा दुई देशबीचको बहुआयामिक तथा बलियो साझेदारीलाई थप गहिरो बनाउने विषयमा विचार आदानप्रदान भएको छ।

भारतको दूतावासले नेपालसँगको सम्बन्धलाई थप मजबुत बनाउने विषयमा छलफल भएको जानकारी सोमबार दिउँसो दिएको छ।

Honoured to call on Rt. Hon. Prime Minister of Nepal (@ShahBalen) this morning. Conveyed warm greetings from Prime Minister Modi ji (@narendramodi). Had an engaging & productive exchange of views on further deepening robust, multi-faceted India 🇮🇳- Nepal 🇳🇵 partnership@MEAIndia… pic.twitter.com/g8HAilTBuU

— Naveen Srivastava, Ambassador of India in Nepal (@navsri6619) August 10, 2026