काठमाडौँ- गृहमन्त्रीका रुपमा दोस्रो पटक पदभार ग्रहणका क्रममा सुधन गुरुङले आफूविरुद्ध लाग्न सक्ने आरोपहरू सहन तयार रहेको बताएका छन्।

तर नेपाली नागरिकहरू, विशेषगरी नेपाली चेलीहरूमाथि अन्याय र चरित्र हत्या सहन नसकिने उनले बताएका छन्।

पदभार ग्रहणपछि उनले आफूमाथि तथ्यबिनाका आरोपहरू लगाइए पनि त्यसलाई सामना गर्न तयार रहेको बताए।

उनले भने, ‘मलाई जस्तोसुकै आरोप लगाइए पनि म सहन सक्छु, तर अरूलाई दुःख दिएको कुरा म सहन सक्दिनँ।’

गुरुङले मिडिया ट्रायलका कारण कुनै पनि व्यक्तिले आत्महत्या गर्नुपर्ने अवस्था आउन नहुने भन्दै त्यसप्रति सरकार गम्भीर हुने बताए।

उनले गृहमन्त्रालयले अबदेखि चरित्र हत्या र आधारहीन आरोपहरूलाई गम्भीर रूपमा हेर्ने पनि बताए । उनले थपे, ‘जति आक्रमण गर्नुछ मलाई नै गर्नुस्, तर तथ्यका आधारमा हुनुपर्छ, तोडमोड हुनु हुँदैन।’

गृहमन्त्री गुरुङले नेपाली चेलीहरूको चरित्र हत्या जस्ता विषयमा मन्त्रालय कठोर रूपमा प्रस्तुत हुने प्रतिबद्धता पनि जनाए।

उनले अब सबै फाइल खोलेर कारबाही गरिने पनि बताए। गुरुङले नेपाल प्रहरीको केन्द्रीय अनुसन्धान ब्यूरोअन्तर्गतका पेन्डिङ फाइल तत्काल टुंगो लगाउन द्रुत गतिमा काम थालिने उनले बताए । अब ब्यूरोमा विशिष्ठिकृत समूह बनाएर सबै मुद्दाको फाइल खोलिने पनि बताए ।