काठमाडौं- राष्ट्रिय प्रजातन्त्र पार्टीले आर्थिक वर्ष २०८३/०८४ को बजेटमा उल्लिखित करका दरमा आफूखुसी गरिएको संशोधनलाई लिएर अर्थमन्त्री डा. स्वर्णिम वाग्लेको राजीनामा मागेको छ।

प्रतिनिधि सभाको मंगलबार बसेको बैठकमा बोल्दै प्रमुख सचेतक खुश्वु ओलीले अर्थमन्त्रीले मार्ग प्रशस्त गर्नु उपयुक्त हुने बताइन्। उनले त्यसो भन्दा मन्त्री वाग्ले संसद्‍मै उपस्थित भएर मुस्कुराइरहेका थिए ।

‘आज अर्थमन्त्रीज्यू आउनुभएको छ, उहाँले यस संसद्‍मा आएर स्पष्टीकरण दिनुहुन्छ होला। तर यो विषय यति गम्भीर भएको छ कि निष्पक्ष र विश्वसनीय छानबिन अपरिहार्य बनिसकेको छ’, उनले भने, ‘त्यसैले छानबिन प्रक्रिया सम्पन्न नहुँदासम्म अर्थमन्त्रीले आफ्नै विवेक प्रयोग गरेर, सुशासन कायम गर्न नैतिकता र निष्पक्षताको दृष्टिकोणले जिम्मेवारीबाट पर रहनुपर्छ जस्तो लाग्छ ।’