काठमाडौं– नेपाल–भारत सीमासम्बन्धी विषयमा प्रधानमन्त्रीको अभिव्यक्ति फिर्ता लिन माग गर्दै सांसदहरूले गरेको विरोधका कारण राष्ट्रियसभा पनि अवरुद्ध भएको छ ।  

मंगलबार राष्ट्रियसभा सुरु हुनेबितिकै राष्ट्रियसभाका सांसदहरूले प्रधानमन्त्रीले आफ्नो अभिव्यक्ति नसच्याएसम्म बैठकको काम कारबाही अघि बढ्न नदिने अडानसहित उठेर विरोध जनाएपछि बैठक जेठ २८ गते बस्ने गरी स्थगित गरिएको हो ।

त्यसअघि बैठकमा राष्ट्रियसभा सदस्य नारायण दत्त मिश्रले सीमामा रहेका दुवै देशतर्फका नागरिकले एक–अर्कोदेशमा खेतीपाती गरेको देखिए पनि नेपालले भारतको सीमा भने नमिचेको बताए । 

सीमा विवाद सम्बन्धी अति संवेदनशील विषयमा प्रधानमन्त्रीले दिएको अभिव्यक्ति आपत्तिजनक भएको उनले बताए । उनले प्रधानमन्त्री स्वयं सदनमा आएर यस विषयमा स्पष्ट पार्न माग गरे । 

सांसदहरूले निरन्तर उठेर विरोध जनाएपछि राष्ट्रियसभा अध्यक्ष नारायणप्रसाद दाहालले बसेर सदन सञ्चालनका लागि आग्रह गरेका थिए । तर विरोध कायमै रहेपछि उनले जेठ २८ गते बस्नेगरि बैठक स्थगित गरे ।