भैरहवा – रूपन्देही जिल्ला क्रिकेट संघको अध्यक्षमा पूर्वराष्ट्रिय क्रिकेटर शक्ति गौचन पराजित भएका छन् । शक्तिलाई पराजित गर्दै हरिबहादुर थापा दोस्रो कार्यकालका लागि निर्वाचित भएका छन्।

कुल खसेको मतमध्ये थापाले ६९ मत प्राप्त गरे भने उनका निकटतम प्रतिद्वन्द्वी गौचनले ४९ मत पाए । चार वर्षअघि भएको निर्वाचनमा पनि थापासँग गौचन पराजित भएका थिए ।

यसपटकको निर्वाचनमा थापा र गौचन आ–आफ्नो प्यानल बनाएरै चुनावी प्रतिस्पर्धामा उत्रिएका थिए । संघको उपाध्यक्षमा खेमराज भुसाल, सचिवमा उदयकुमार मल्लिक र कोषाध्यक्षमा धीरज अधिकारी क्षेत्री निर्वाचित भएका छन् ।

मतदान अधिकृत प्रकाश न्यौपानेका अनुसार महिला सदस्यमा उमा अधिकारी तथा अन्य सदस्यहरूमा प्रशान्तविक्रम मल्ल, नीरजप्रताप खाँण, पुनित पोखरेल, मनोज भण्डारी, भुवन पाण्डे, विजयसिंह ज्ञवाली, कृष्णकुमार कुँवर, ज्वालेसप्रसाद प्रधान, अन्तिम थापा र ताराप्रसाद पाठक निर्वाचित भएका छन् ।

गौचन र थापा दुवै पक्ष स्पष्ट प्यानलसहित चुनावी मैदानमा उत्रिएपछि जिल्लाका कतिपय खेलप्रेमीहरूले भने क्रिकेटको विकासका लागि यसरी प्यानलगत रूपमा विभाजन हुन नहुने धारणा राखेका थिए ।