हेटौँडा– राष्ट्रिय स्वतन्त्र पार्टी (रास्वपा) को प्रदेश अधिवेशन आजदेखि सुरु हुँदैछ । प्रदेशस्तरीय अधिवेशनको आन बागमती प्रदेशबाट सुरु हुन लागेको हो ।

हेटौँडास्थित हिमालयन दरबारमा हुने अधिवेशनको पार्टी सभापति रवि लामिछानेले उद्घाटन गर्ने कार्यक्रम रहेको छ ।

प्रदेश सभापति पदका लागि हालका बागमती प्रदेश सभापति डा. अच्युतम लामिछाने पुनः सोही पदमा दोहोरिन चाहेका छन् । लामिछाने हाल नुवाकोटबाट निर्वाचित प्रतिनिधिसभा सदस्य हुन् ।

त्यसैगरी, प्रदेश उपसभापति पदमा डा. रमेश ढकाल आकांक्षी देखिएका छन् । उनी लामो समयदेखि चिकित्सा क्षेत्रमा सक्रिय रहँदै आएका छन् । साथै, उनी जोरपाटीस्थित शंखरापुर अस्पतालका सञ्चालक पनि हुन् । महामन्त्री पदमा हालका महामन्त्री सुरेन्द्र भट्ट पुनः आकांक्षी देखिएका छन् ।

रास्वपाको विधानअनुसार बागमती प्रदेश समिति ६५ सदस्यीय हुने व्यवस्था गरिएको छ । समितिमा सभापति, उपसभापति र महामन्त्री एकरएक जना रहने प्रावधान छ ।

त्यस्तै, दुई जना सहमहामन्त्री रहने तथा उनीहरू फरकफरक लिङ्गका हुनुपर्ने व्यवस्था विधानमा उल्लेख गरिएको छ । पदाधिकारीमा सभापति, उपसभापति, महामन्त्री, सहमहामन्त्री, कोषाध्यक्ष र प्रवक्ता रहने व्यवस्था गरिएको छ ।

निर्वाचन प्रक्रियाअनुसार पहिलो चरणमा सभापति र प्रदेश सदस्यहरूको निर्वाचन हुनेछ । प्रदेश सदस्यमा निर्वाचित भएकामध्येबाट थप पदाधिकारी चयन गर्न प्रतिनिधिहरूले दोस्रो चरणको मतदान गर्नुपर्ने व्यवस्था गरिएको छ ।

रास्वपाले प्रथम राष्ट्रिय महाधिवेशनको तयारी स्वरूप हालसम्म ५६ जिल्लाको अधिवेशन सम्पन्न गरिसकेको छ । बाँकी जिल्लाहरूमा विविध कारणवश रोकिएको निर्वाचन प्रक्रिया अगाडि बढाउने तयारी भइरहेको रास्वपाले जनाएको छ ।

रास्वपा केन्द्रीय निर्वाचन विभागका प्रमुख भुवन केसीका अनुसार १२ जिल्लामा निर्वाचन प्रक्रिया जारी छ भने केही जिल्लामा प्राविधिक कारणले अधिवेशन सुरु हुन बाँकी छ । रास्वपाले महाधिवेशनको तयारी स्वरूप जेठ २३ देखि देशभर जिल्ला अधिवेशन सुरु गरेको थियो । यस्तै, रास्वपाले वडा र पालिका तहको अधिवेशन सम्पन्न गरिसकेको छ ।

पार्टीको प्रथम ऐतिहासिक महाधिवेशन आगामी असार ७ देखि ९ गतेसम्म चितवनमा हुनेछ ।