काठमाडौँ – फिफा विश्वकप २०२६ मा खेल सञ्चालन गर्न अमेरिका पुगेका सोमालियाका शीर्ष रेफ्री ओमार अर्टानलाई त्यहाँको सरकारले प्रवेश अनुमति दिन अस्वीकार गरेको छ । यस घटनाले अमेरिकी यात्रा प्रतिबन्ध र त्यसको विश्वकपमा पर्ने असरबारे चासो र चिन्ता बढाएको छ ।

अमेरिकी गृह सुरक्षा मन्त्रालयले रेफ्री अर्टानलाई देशमा प्रवेश नदिइएको पुष्टि गरेको छ । मन्त्रालयका प्रवक्तालाई उद्धृत गर्दै अल जजिराले लेखेको समाचार अनुसार शनिबार दक्षिण फ्लोरिडा आइपुगेका अर्टानको ‘भेटिङ’ (सुरक्षा जाँच) का क्रममा कैफियत देखिएपछि उनलाई अयोग्य ठहर गर्दै प्रवेश निषेध गरिएको हो । यद्यपि, उनीसँग अमेरिका आउनुअघि वैध भिसा रहेको बताइएको छ ।

अर्टान फिफाले विश्वकपका लागि छनोट गरेका ५२ मुख्य रेफ्रीहरूको सूचीमा छन् । उनी विश्वकपमा खेल खेलाउने पहिलो सोमाली रेफ्री बन्ने तयारीमा थिए । सोमालिया अमेरिकी राष्ट्रपति डोनाल्ड ट्रम्पको यात्रा प्रतिबन्ध लगाइएका देशको सूचीमा छ ।

क्यानडा र मेक्सिकोसँगको संयुक्त आयोजनामा भइरहेको विश्वकप र अमेरिकी यात्रा नीतिका कारण उब्जिएको यो पछिल्लो विवाद हो । यसअघि इरानको राष्ट्रिय टोलीले पनि भिसा समस्याका कारण मेक्सिकोमै बस्नुपरेको थियो । इरानी खेलाडीहरूलाई खेल खेल्नका लागि मात्र अमेरिका प्रवेशको अनुमति दिइएको छ भने खेल सकिएलगत्तै उनीहरू मेक्सिको फर्कनुपर्नेछ । इरानका केही प्राविधिक टोलीलाई भने अमेरिकाले भिसा नै दिएको छैन ।

विश्वकपका खेलहरू भइरहेका रंगशाला आसपासमा अमेरिकी सङ्घीय एजेन्टहरूले विदेशी नागरिक र कागजपत्र नभएका आप्रवासीहरूलाई दुःख दिन सक्ने भन्दै सुरक्षा चासो समेत बढ्न थालेको छ ।